ТАТАРЧА ЗАМАНЧА СЛЕНГ

Көн туса, интернетта яңа сүзләр барлыкка килә. Юк, мин хайп һәм кринж турында сөйләргә җыенмыйм. Ул сүзләрне без, яшьләр түгел, өлкәннәр дә куллана инде. Бу язмада мин хәзер иң актуаль сленг мисалларын тупладым. Алай гына да түгел, бергәләп бу сүзләрнең татарча версияләрен дә уйлап карарбыз. Киттек!

АЛЬТУШКА – ҮЗГӘШКА

Бу сүз «альтернатива» ягъни «үзгә» сүзеннән ясалган. Инде аңлашылганча, бу сленг ярдәмендә башка төрле киенүче, башка төрле фикерләүчеләрне атыйлар. Гадәттә, алар бик кыю макияж ясап, кара төстәге оверсайз, эмо, гот һәм панк (әйе өчесе дә) стиленә хас киемнәр кияләр. Альтушка, ә татарча әйтсәк, үзгәшка!

СТРЕЙТ – АГЫМДАГЫ

Үзгәшкаларның каршы ягындагы кеше инде бу. Агым, ягъни җәмгыять ни куша, шуны эшли. Популяр булган җырлар тыңлаучы, башкалар кебек киенүче, трендларга иярүче кеше була инде ул. «Мейнстрим» сүзен хәтерлисезме? Менә шул була инде ул.

ДЕЛУЛУ – МӘҖНҮН

Син яраткан җырчыңа кияүгә чыгып / өйләнеп, мәңге эшләмичә рәхәттә ятарга хыялланасың икән, котлыйм, син – мәҗнүн. Делулу дип үз хыялларында яшәүчеләргә карата әйтәләр. Хәтта сүзнең килеп чыгышы да инглиз теленнән «хыяллары тоткынында» дип тәрҗемә ителә. Нигә мәҗнүн дисезме? Низаминың «Ләйлә һәм Мәҗнүн» әсәрен укырга киңәш итәбез. Анда да төп герой хыялланырга бик ярата.

СОФТ – РӘХӘТИК

Софт кызлар һәм софт егетләр бик рәхәт һәм йомшак булуны сайлаганнар. Аларның киенү рәвеше дә күбесенчә аксыл көрән, алсу, ак төсләрдән тора. Гадәттә, алар башкаларга карата бик йомшак, аңлаучан. Алар башкалардан мөлаем һәм хисле булулары белән аерылып тора. Рәхәтиклар инде, билләхи.

СТЭНИТЬ – ТӘПИЛӘРГӘ

Бу сүзнең аерым бер тарихы бар. 2000 елларда Eminem «Stan» җырын яза. Биредә көннәр һәм төннәр буе үз кумирын күзәтеп йөргән җанатар тормышы яктыртыла. Шуннан башлап, башка кешенең тормышы белән артык нык кызыксыну һәм аны күзәтеп баруны «стенить» сүзе белән атый башлыйлар. Без исә аны татарчалаштырып «тәпиләү» дип атадык. Ягъни крашыңның һәр адымын «тәпиләп» күзәтеп йөрү.

КОР – ЗӘВЫК

Бүген социаль челтәрләрдә кор дип тәмамланган сүзләр һәм терминнар шактый. Мисал өчен барбикор, гоблинкор, коттедж кор. Бер карасаң бик сәер яңгырый. Ә чынлыкта исә бу «кушымта» аерым бер стильгә охшап эшләү дигәнне аңлата. Димәк барбикор ул – курчак зәвыгы, бейби кор – бала зәвыгы.

ТИЛЬТ – ХӘЧТЕРҮШЛӘНҮ

Кызыклы факт – сленг сүзләрнең күбесе геймерлар лексиконыннан кергән. «Тильт» сүзе белән дә шул ук хәл. «Мин – тильтта» (безнең очракта хәчтерешләнү) дию уен барышында дулкынланудан югалып калдым, теләсә нәрсә эшли башладым, башым катты дигәнне аңлата. Бүген исә бу термин белән эмоцияләргә өстенлек биреп хаталануны, дөрес эшләмәүне атыйлар. Сезгә дә хәчтерүшләнүнең чамасын белергә киңәш итәбез.

СЛЭЙ – ҮТЕРГИЧЕСКИ

«Кызый, бу күлмәгең үтергически булган синең!» - диләр бит әниләр. Шул «слэй»ны күз алдында тоталар инде. Бу термин нәрсәнең дә булса искиткеч югары дәрәҗәдә сокландыргыч булуын аңлата. Сленг-комплимент килеп чыга инде монда.