КАЗАН ЯШЬ ТАМАШАЧЫ ТЕАТРЫ ГАШЫЙК ЯШҮСМЕРЛӘР ТУРЫНДА АУДИОСПЕКТАКЛЬ ТӘКЪДИМ ИТӘ

Казан рус яшь тамашачы театры икенче аудиоспектакль тәкъдим итә. Ирина Васьковская пьесасы буенча әзерләнгән «Без. Трамвай. Мәхәббәт» спектакле гашыйк яшүсмерләр Егор һәм Алина, шулай ук ялгыз пенсионер Аркадий Иванович тарихын сөйләячәк.

«Без. Трамвай. Мәхәббәт» аудиоспектакле чәршәмбе саен 23:00 сәгатьтә «Җиңү проспекты» метро станциясе» тукталышыннан (Азино ягына) уйнатыла башлаячак. Соңгы тукталыш «Тимер юл вокзалы» булачак. Спектакльнең озынлыгы бер сәгатькә якын, тамашачыларга колакчыннар таратылачак, ә декорацияләр Казан күренешләре булачак. Билет сату август аенда ачылачак, аудиоспектакль 14 яшьтән өлкәнрәк яшүсмерләр өчен билгеләнгән, дип хәбәр иттеләр Яшь тамашачы театры матбугат хезмәтендә.