КУМИРЫҢ БАРМЫ?

Әниләрегезнең: «Бүген максатчан, үз фикеренә тугры кала торган егетләр юк. Менә безнең замандааа!..», – дигәннәрен еш кына ишетергә туры киләдер. Сораштыруыбыз геройлары аша әлеге фикернең хаклыкка туры килмәгәненә төшенергә тәкъдим итәм. Бүгенге көн яшьләре үзләренә үрнәк итеп кемне куя? Кумирларының кайсы сыйфатлары аларда соклану хисе уята? Яшьләр ниләр белән мавыга? Әйдәгез, үзләреннән сорап китик!

Әнвәр Мөхетдинов, 17 яшь: «Социаль челтәрләрен күзәтеп бару миңа көч бирә»

Мин киләчәктә татар даирәсендә үсеш алырга, телебезне заманча яктан танытырга телим. Шуңа күрә кумирларым да – нәкъ менә татар даирәсендә танылу алган шәхесләр. Беренчесе – танылган алып баручы, журналист Рамил Шәрәфиевне. Аны социаль челтәрләр аша күзәтеп барам һәм Рамил абыйның үз битен бары тик татарча гына алып баруына сокланам. Алып баручы Иван Остроумовны да үземнең кумирым итеп саныйм: ул татар һәм рус телләрендә матур, камил сөйләшә. Икесенең дә социаль челтәрләренә куйган материаллары, чыннан да, миңа энергия һәм көч бирә. Бер көн дә тик тормый бит алар: бүген бер чарада, иртәгә инде икенчесендә! Шул вакытта радио-телевидениегә да өлгерәләр. Сокланмый мөмкин түгел бит!

Камил Гыйбадуллин, 14 яшь: «Иң элек, уйга сәләтле һәм танылган спортчылар килә»

Кечкенәдән үк төрле спорт уеннары белән мавыкканга күрә, уйга сәләтле һәм танылган спортчылар килә. Соңгы берничә елда мин волейбол уены белән кызыксына башладым. Калабызның «Зенит-Казан» командасының «связующий» ролен башкарган уенчысы Майк Кристенсон белән таныштым. Ул үзе чит илдә туып-үскән булса да, Казан командасы өчен ихластан, бар көчен куеп уйный. Сокланырлык сыйфатлары байтак: Майк дөнья күләмендә үткәрелгән ярышларда берничә кат җиңү яулаган, «Зенит-Казан» командасының уңышларында да аның өлеше бик зур икәнен исбатлап тора. Кумирымның бу дәрәҗәгә бары тик үз тырышлыгы белән ирешүенә шигем юк. Бу илһамландыра, үз өстеңдә эшләргә этәргеч бирә. Мин бүгеннән үк, аннан үрнәк алып, даими шөгыльләнәм, югары дәрәҗәләргә омтылам. Мин дә, тиешле күләмдә көчләремне куйсам, үзем теләгән нәтиҗәгә ирешермен дигән фикердә калам. 

Рәсүл Хәбибрахманов, 16 яшь: «Әтиемнән киңәшләр сорап, аннан үрнәк алып яшим»

Минем кумирым – әтием Гөлүс Хәбибрахманов, татар эстрадасының танылган җырчысы. Әтием кечкенәдән үк җырлаган, укыган, өйрәнгән һәм эстрада дәрәҗәсенә кадәр чыга алды. Минем дә киләчәктә үземнең җырларымны чыгарып, дөньяга таныласым килә. Моның өчен хәзердән үк төрле иҗади чараларда, бәйгеләрдә катнашам, җырлар язам. Бәлки, гитарада уйнап, спектакльләрдә катнашып, мин дә эстрада дәрәҗәсендә танылу алуга кадәр барып җитә алырмын. Көн саен әтиемнән киңәшләр сорап, аннан үрнәк алып яшим.

Камил Кәримов, 17 яшь: «Макс Корж – яшьлек фәлсәфәсе»

Без, яшүсмерләргә, кумирлар зур йогынты ясарга сәләтле. Минем кумирым исә – җырчы Макс Корж. Ул үзенең җырларында тормыш сорауларына кагылышлы темаларны һәрьяклап күтәрә. Аның тирән мәгънәле җыр юлларында сиңа көч биреп, озата барырдай фикерләр тупларга мөмкин. Шулардан иң истә кала торганы – «Своих не забывать, вместе идти, вместе и до конца!» Минемчә, кешенең кумирын белсәң, аның турында күп нәтиҗәләр ясап була. Җырчыны тыңлаучылар арасында «Макс Корж – яшьлек фәлсәфәсе» дигән гыйбарә дә йөри. Мин үзем дә, музыка сәнгатенә гашыйк кеше буларак, дустым итеп, гитараны сайладым. Һәм еш кына, Макс Коржның җырларын өйрәнеп, яратып башкарам. Кумирымны  якыннан күрү, аның концертында булу – төп хыялларымның берсе!

Кәрим Галиев, 14 яшь: «Композицияләренең яңгырашы аеруча үзенә җәлеп итә»

Минем өчен үрнәк булып торучы шәхес ул – «УСАЛ» тәхәллүсе астында иҗат итүче танылган башкаручы Нәзим Исмәгыйлев. Аңа берникадәр охшарга да тырышам, чөнки ул гамәлләрен оялмыйча башкара, үз мөмкинлекләрен һәрвакыт тулысынча куллана. Башкаручының иҗатын күп кеше, билгеле, яратып та бетерми, тик тыңлаучылары арасында яшьләр аз түгел. Нәзимнең җырлары тормыш фәлсәфәсе белән тулы: башкаручы яшәеш сорауларына җаваплар эзли, тыңлаучыларын дөрес юлга өнди. Композицияләренең яңгырашы аеруча үзенә җәлеп итә, дип саныйм: рэп катыш милли көйләр күп кешенең күңеленә үтеп керә, миңа калса!