«ӘТИ, ӘНИ ҺӘМ БЕЗ»

Күп очракта әти-әни белән уртак фикергә килеп булмыйча азапланырга туры килә. Аларга сары футблка ошаса, синең кызыл күлмәк киясең килергә мөмкин... Мондый очракта нишләргә соң? Бәлки, алар күбрәк беләләр, сиңа яхшылык кына телиләрдер? Уйланырлык урын бар, дустым...

1. Әти-әниең сине аңлый дип саныйсыңмы?

2. Үзең өчен мөһим булган мәсьәләләр турында әти-әниең белән киңәшләшәсеңме?

3. Аларның эше, һөнәре белән кызыксынасыңмы?

4. Әти-әниең дусларың белән танышмы?

5. Иптәшләрең сезгә киләме?

6. Ә син әти-әниеңнең дуслары белән танышмы?

7. Хуҗалык эшләрендә ярдәм итәсеңме?

8. Буш вакытыңны өйдә, әти-әниең белән уздырырга яратасыңмы?

9. Әти-әниең белән уртак мавыгуларың, кызыксынларың бармы?

10. Гаилә бәйрәмәренә бергә әзерләнәсезме?

11. Укыган китап, караган кино, тапшырулар турында әти-әниең белән фикер алышасызмы?

12. Бергәләп кино, концертка барганыгыз бармы?

«Әйе» - 2 балл. «Юк» - 0

0-10 балл. Сезнең мөнәсәбәтләр әллә ни мактанырлык түгел. Кайбер мәсьәләләрдә бер-берегезне аңламыйсыз, шуның аркасында тавыш-гауга да чыккалый. Син, бәлки, үзеңә игътибар җитми дип саныйсыңдыр. Мөнәсәбәтләрне яхшырту өчен беренче адымны үзеңә ясарга туры килер. Әти-әниеңә карата игътибарлы бул, өйдә ярдәм итәргә тырыш.

12-16 балл. Сездәге хәлләр начар түгел, ләкин аны тагын да яхшыртып була. Әти-әниеңә серләреңне чишәргә, алар белән киңәшләшергә курыкма.

18-24 балл. Сезнең гаиләдә барысы да тәртиптә. Бер-берегезгә тулысынча ышанасыз. Бернәрсәне дә үзгәртергә кирәкми.