"САБЫЙГА"

Бүгенге болытлы, яңгырлы иртәдә

Җәелде гомерең юллары.

Алар мең... Тормышың сиңа дип кайсысын

Хәерле иттереп юллады?

Аяктан егарга язмышың тырышса,

Намуска таян син, абынма!

И бала, яшьлектә ни-нәрсә үстерсәң,

Шул килер картлыкта табынга.

Нәфеска хезмәтче булучы кешенең

Үзенә төбәлгән ядрәсе.

Капкынга эләгә күрмә син ялгышып,

Ятларны алдыйм дип, янәсе.

Бүгенге болытлы, яңгырлы иртәдә

Яралды гомерең йолдызы.

Тормышың яңгырлы булмасын, дип тели

Фәрештәң, гөнаһсыз җир кызы.