"ФӘНИС ҖИҺАНША ТӘКЪДИМ ИТӘ"

УКЫ

Галимҗан Ибраһимовның «Алмачуар» әсәрен укырга тәкъдим итәм. Балачактан таныш бу хикәя безгә тугрылык, җан ияләренә карата мәрхәмәтлелек кебек матур хисләрне күрсәтә. Кеше тирә-юне белән гармониядә булса гына бәхеткә ирешә ала. Без дә моңа өйрәнсәк иде.

ТЫҢЛА

«Сак-Сок» төркемен. 1990 елларда Чаллы егетләре, The Beatles, Rolling Stone һәм Deep Purple төркемнәрен тыңлап, татарча җырлаган рок-төркем төзергә тели. Һәм булдыралар да! Милли моңнарны рок белән кушып булмый, дисеңме – «Сак-Сок»ны тыңлап кара.

КАРА

«Гладиатор» фильмын карарга (режиссеры Ридли Скотт, 2000) тәкъдим итәм.  Әлеге картина бөек Рим империясе заманнарына алып кайта. Тамашачы яугир Максимус һәм аның курку белмәс гаскәре белән таныша. «Гладиатор»ның иң мөһим ягы – бу фильм туган илеңне, нигезеңне онытмаска өйрәтә. Кайда гына булма, кайсы гына мохиткә ташламасын сине язмыш – үз-үзеңне югалтмас өчен тамырларыңны тоярга кирәк.