"ДИЛӘРӘ ВАҺАПОВА ТӘКЪДИМ ИТӘ"

УКЫ!

Антуан де Сент-Экзюпери. «Кечкенә Принц».

Кешеләр ике төргә бүленә: китапны укучылар һәм аны тыңлаучылар. Мин соңгылары рәтенә керәм. Тыңлап йөрим китапларны. Сезгә киңәш иткән китабым — «Кечкенә Принц». Минемчә, бу китапны иң сабыйлардан алып, сиксән-туксаннарны тутырып килүче әби-бабайларга да укырга була. Сихерле китап!

ТЫҢЛА!

П.И.Чайковский. «Щелкунчик» балеты.

Үзем өчен шундый формула чыгардым һәм аны кызымда тикшереп тә өлгердем: әгәр балагыз «Щелкунчик»ны кабул итә ала икән, бүтән опера-балетларны да яхшы гына «йотачак». Хәтта «Шүрәле»не дә. Ә классик сәнгатьне кечкенәдән яратырга өйрәтергә кирәк, зыянга булмас.

КАРА!

«Иисус Христос — Суперзвезда», 1973

режиссер:  Норман Джуисон

Фильмнарга килгәндә, мин компьютер программасы кебек. Әйтик, графага язасың: анда шундый-шундый актер уйнарга тиеш, сюжеты шундыйрак булсын, ул теге яки бу фильмга охшасын, кәефемә туры килсен һәм вуаля ‒ мин сезгә теләгән фильмнар исемлеген чыгарып бирәм. Ә беренче тәкъдимем ‒ «Иисус Христос ‒ Суперзвезда».