ДМИТРИЙ ТУМАНОВ #ПОДПИСКАБҮЛӘКИТ АКЦИЯСЕНӘ КУШЫЛДЫ

«Татмедиа» АҖ игълан иткән #ПодариПодписку акциясен хуплаучылар арта бара. Бүген аның кысаларында «Созвездие-Йолдызлык» фестиваль хәрәкәтенең генераль продюсеры Дмитрий Туманов быел фестивальдә уңышлы чыгыш ясаган район, шәһәр бию, җыр коллективларына газет-журналларга язылу бүләк итте.

Шулай итеп, «Созвездие-Йолдызлык»ның Аксубай, Норлат, Кайбыч, Зәй, Яңа Чишмә, Лениногорск, Чирмешән һәм Казанда яшәүче яшь талантлары «Сабантуй», «Ялкын», «Салават күпере», «Идел», «Казан» журналларын, шулай ук «Казанские ведомости» газетасын уку мөмкинлегенә ия булды.



«Болар барысы да үсеп килүче буынның якты киләчәге өчен эшләнелә. Җыр-биюгә, китап, вакытлы матбугат укуга тартылган баланың телевизор каршында утырырга вакыты калмый», – ди Дмитрий Александрович.

Сүз уңаеннан, озакламый «Созвездие-Йолдызлык»ның нәни артистлары Кырымда узачак концертларда чыгыш ясаячак.