МӘХӘББӘТ НИЧЕК ТУА ҺӘМ КАЙДА ЯШИ?

Мәхәббәт – иң көчле һәм серле хисләрнең берсе. Ул шигырьләрдә яңгырый, төрле сурәтләрдә чагылыш таба, романнарда һәм драмаларда аңа дан җырлана. Тик мәхәббәт – нәрсә соң ул? Ничек туа һәм кайда яши?

Мәхәббәт – кешелек яшәешенең нигезе

Мәхәббәт – безнең тормышыбызны тулырак һәм мәгънәлерәк иткән иң бөек көч. Ул безнең йөрәкләребездә һәм күңелләребездә урын ала. Мәхәббәт үзендә һәрвакыт яктылык, җылылык һәм игелек йөртә.

Мәхәббәт формалары

Күп кеше мәхәббәт хисләрен яратып йөргән кешесенә карата гына кичереп була дип уйлый. Тик бу алай түгел. Мәхәббәтнең формалары төрле булырга мөмкин: кешедә әти-әнисенә, балаларына, дусларына, үз эшенә, табигатькә, туган җиргә, сөйгән ярына һәм башкаларга карата ярату хисләре яши ала. Күңелебездә кайсы гына формасы урын алса да, без үзебезне тулы һәм бәхетле итеп хис итәбез.

Мәхәббәт вак-төякләрдә яши

Мәхәббәт олы хис һәм гормон ташкыннарында гына түгел, ә гади тормышның нечкәлекләрендә дә күзәтелә. Гашыйкларның бер-берсен кайгыртып яшәүләре, терәк сүзләре, елмаюлары – боларның һәммәсе дә ярату аша башкарыла. Ул бергә кичергән кайгы һәм шатлыкларда, истәлек-хатирәләрдә саклана. Мәхәббәт – олы хис кенә түгел, ә гашыйкларның бер-берсен тыңлап, аңлап, ишетеп эш итүләре, ялгышларын кичерә белүләре.

Мәхәббәтне кайдан табарга?

Мәхәббәтне эзләргә кирәкми: сөйгән ярың көтелмәгән урында һәм мизгелдә сине үзе табачак. Шулай да дөньяга ачык булу, яңа танышуларга һәм тәэсирләргә әзер булу комачау итмәс!

Мәхәббәт очраклы караштан, үзеннән-үзе килеп чыккан әңгәмәдән, уртак кызыксынулардан башланырга мөмкин. Бары тик үз хисләреңә ышанырга һәм башка кешеләргә ачылырга курыкмаска кирәк.

Мәхәббәт ул – сер. Һәм ул аңа әзер булган һәркемгә килә ала!

Фото: Freepik.com