ФАРАОН ЕЛАНЫ ЭКСПЕРИМЕНТЫ

Элемтәдә – Хәсән, һәм без эксперимент сәхифәсен дәвам итәбез! Бу юлы мин сезгә кара «елан» күрсәтәм. Курыкмагыз, ул тере түгел, ә бары тик химик реакция нәтиҗәсе генә. Ләкин мондый хәйран калдыргыч эффектны сезнең әле беркайчан да күргәнегез булмагандыр. Бу экспериментны химия дәресендә укытучы белән үткәрергә киңәш итәбез.

Моның өчен түбәндәгеләр кирәк:

1. кальций глюконаты таблеткалары;

2. коры спирт таблеткасы;

3. керамик савыт, тимер таба яки кирпеч (утка чыдам нәрсә);

4. шырпы.

Эксперимент этаплары:

I. Коры спиртны керамик савытка сал.

II. Спирт өстенә 2-3 кальций глюконаты таблеткаларын тез.

III. Спиртны яндырып җибәр.

IV. Бер минут көт: таблеткалар эри башлагач, алардан бөтерелгән кара-көрән төстәге «елан» барлыкка киләчәк. Бер таблеткадан 10-15 см «елан» чыга.

Берничә таблетканы бергә куйсаң, елан тагын да озынрак булачак. Монда бернинди дә сихер юк, бу – гап-гади химия. Кальций глюконаты (C₁₂H₂₂CaO₁₄) яндыргач, газга һәм күмергә таркала. Газ (CO₂) чыгып китә, ә күмер «елан» формасында катып кала.

Искәртү! Алда әйтелгәнчә, бу эксперименты укытучы яки әти-әни күзәтүе астында гына үткәрергә ярый. Шулай ук яныгызда су яки ком салынган савыт булсын. Эксперимент вакытында сак булыгыз, ахырдан кулыгызны сабын белән әйбәтләп юыгыз.