ТАТАРСТАНДА 1 СЕНТЯБРЬДӘ ЛИНЕЙКАЛАРНЫҢ НИЧЕК УЗАЧАГЫ БИЛГЕЛЕ БУЛДЫ

Татарстанда 1 сентябрь уңаеннан уздырыласы мәктәп линейкалары тагын чикләнгән режимда үтәчәк.

Бәйрәм аерым сыйныфлар белән, ачык һавада, ата-аналар өчен шәхси саклану чаралары кулланып оештырылачак дип хәбәр ителә. Мәктәп линейкасына коронавирустан прививка ясатмаган ата-аналар да килә ала.

«Төрле сыйныфлар һәм мәктәпләр арасында массакүләм чаралар үткәрү тыела», -  ди Роспотребнадзорның Татарстан буенча идарәсе матбугат җитәкчесе Миләүшә Җамалиева. Аның сүзләренчә, узган уку елында гамәлдә булган санитар кагыйдәләр киләсе уку елында да үз көчендә калачак.