ТАТАР КИТАБЫ ЙОРТЫНДА БАЛАЛАР ШАГЫЙРӘСЕНӘ БАГЫШЛАНГАН КИЧӘ УЗАЧАК

15 мартта 15:00 сәгатьтә Татар китабы йортында танылган балалар язучысы Әминә Бикчәнтәеваның 110 еллыгы уңаеннан «Язгы бүләкләр» кичәсе узачак. Кичәдә шигырьләр укылачак, шагыйрә сүзләренә язылган җырлар башкарылачак.

Әминә Бикчәнтәева иҗатының төп темасы – туган як табигатенең матурлыгы, кешелеклелек, балаларның әти-әниләре белән мөнәсәбәтләре. Шигырьләре, хикәя һәм повестьлары балаларга карата әниләрчә җылылык белән сугарылган.

Кичәнең олы кунагы язучының кызы – музыка белгече Зөбәрҗәт Арсланова. Ул шәхси архив материаллары буенча Әминә Бикчәнтәеваның биографиясе белән таныштырачак һәм әнисе турында йөрәгендә уелып калган якты истәлекләр белән уртаклашачак.