«КОСМОСКА ЧЫГУ»: ЗАМАНЧА СӘНГАТЬ ГАЛЕРЕЯСЫНДА КОСМОС БЕЛӘН БӘЙЛЕ КҮРГӘЗМӘ АЧЫЛА

Бүген, 13  апрельдә, ТР Дәүләт сынлы сәнгать музееның Заманча сәнгать галереясында Мәскәүнең «Космоска чыгу» күргәзмәсе ачылачак. Күргәзмә СССРда Җирнең беренче ясалма иярченен җибәрүнең 65 еллыгына багышлана.

Экспозициядә Россия Рәссамнар иҗат берлегенең Төбәкара яшьләр остаханәсе эшләре күрсәтеләчәк, дип хәбәр итә музейның матбугат хезмәте.

Кунакларга арт-объектлар, космос тематикасы буенча әсәрләр сериясе, тукыма экспонатлары, фотография, керамика, графика, рәсем сәнгате, видео һәм инсталляцияләр тәкъдим ителәчәк.

Күргәзмә ачылышына 16:00 сәгатьтән 17:00 сәгатькә кадәр керү ирекле. Ул 14  майга кадәр эшләячәк.