КАЗАНДА «ГОРЬКИЙФЕСТ» МУЗЫКАЛЬ-ӘДӘБИ ФЕСТИВАЛЕ ҮТӘ

28 март көнне Пушкин исемендәге мәдәни үзәктә рус язучысы Максим Горькийның 155 еллыгы уңаеннан чаралар узачак. Килгән кунаклар лекцияләрдә, фотокүргәзмәдә, китап һәм фильм презентациясендә катнаша алачак.

«Горькийфест»та актерлар, режиссерлар, музыкантлар, фотографлар һәм рәссамнар Горький иҗаты турында фикер алышачак. Фестивальдә катнашучыларга язучы тормышының Казан чорын күрсәтәчәкләр. Барлык вакыйгаларга керү алдан теркәлү буенча ирекле, дип хәбәр итә ТР Мәдәният министрлыгының матбугат хезмәте.

«М.Горький һәм Красновидово» китабының презентациясе 13:00 сәгатьтә Горький урамы, 10 адресы буенча узачак. Китап күренекле язучының борынгы рус авылы Волгадагы тормышының мөһим этабын, шулай ук Красновидово авылының тарихын чагылдыра.

Ә 16:00дә «Горький һәм Шаляпин. Исәпләү башлангычы – Казан» күргәзмәсе ачылачак. Кунаклар Шаляпин һәм Горькийның Казан чоры фотосурәтләрен, шулай ук Татарстанның Кама Тамагы районы Красновидово авылы халкы кигән крестьян костюмнарын күрә алачак.

17:00 сәгатьтә исә Эдуард Хәйруллинның «Казан һәм Красновидово буенча Горький эзләре» фильмын тәкъдим итү планлаштырыла. Фильмның авторы – режиссер һәм эзтабар, «Минем университетларым» китабын алып, Алексей Пешков эзләре буенча киткән. Фильмга алдан теркәлү кирәк.

Бәйрәм 18:30 сәгатьтә башланачак «Проза музыканты» тантаналы концерты белән тәмамланачак. Программада язучы яраткан һәм аның иҗатында тәкъдим ителгән музыкаль әсәрләр яңгыраячак. Алар арасында «Песня о Соколе» һәм «Песня о Буревестнике» әсәрләре дә бар.