КАЗАНДА ЯШЬЛӘР КӨНЕНДӘ ХАТЫН-КЫЗЛАР СӘЛАМӘТЛЕГЕ ТУРЫНДА СӨЙЛӘШӘЧӘКЛӘР

27 июньдә Казанның «УРАМ» экстрим-паркында Яшьләр көне кысаларында хатын-кызлар сәламәтлегенә багышланган ачык дискуссия узачак. «Камиллек комплексы: хатын-кыз сәламәтлегенең төп кагыйдәләре?» дип аталган очрашуда федераль һәм Казан экспертлары катнашачак.

Чарада үзеңне даими рәвештә «төзәтергә кирәкле проект» итеп кабул итүдән ничек арынырга һәм организм җибәргән чын сигналларны ничек дөрес аңларга кирәклеге турында сүз барачак.

Фикер алышуның төп темалары арасында хатын-кызлар сәламәтлеге турында киң таралган мифлар, җәмгыять тудырган нигезсез куркулар, үз-үзеңдә җитешсезлекләр эзләү гадәте һәм үзең турында кайгыртуның шәхси стратегиясен булдыру юллары булачак. Белгечләр шулай ук хәвефле симптомнарны мәгълүмати шау-шудан аеру, дәлилле медицина принципларына таяну һәм психологик халәтнең физик сәламәтлек белән бәйләнеше турында сөйләячәк.

Дискуссиядә психолог, блогер һәм мотиватор Лера Вейв, табиб-гинеколог һәм медицина блогеры Ясмин Буали, шулай ук табиб-онколог-маммолог Алсу Рәхимова катнашачак. Очрашуның модераторы булып «РЕАКТОР» арт-резиденциясенең махсус проектлар продюсеры, клиник психолог Анастасия Ивашкевич чыгыш ясаячак.

Чарада катнашу өчен алдан теркәлү узарга кирәк. Яшьләр көненә бәйле актуаль мәгълүмат махсус сайтта урнаштырыла.

Быел Татарстанда Яшьләр көне 27 июньдә билгеләп үтеләчәк. Бәйрәмнең төп мәйданчыгы булып «УРАМ» экстрим-паркы торачак. Программа «Хыял», «Горурлык» һәм «Бердәмлек» юнәлешләрен берләштерәчәк.

Кунаклар өчен белем бирү, спорт, иҗат һәм карьерага багышланган чаралар, мастер-класслар, лекцияләр, интерактив мәйданчыклар, җирле брендлар маркеты һәм концерт программасы әзерләнә. Моннан тыш, волонтерлар өчен дә теркәлү дәвам итә.

Яшьләр көне Росмолодёжь, Татарстан Республикасы Хөкүмәте, ТР Яшьләр эшләре министрлыгы һәм чара партнерлары ярдәме белән үткәрелә.