«КАРА ПУЛАТ» ОПЕРАСЫ КИРЕ КАЙТА 

Ислам динен кабул итүгә 1100 ел тулу уңаеннан Тинчурин театрында тарихи вакыйгаларга нигезләнгән «Кара пулат» операсы куелачак. Аның музыкасын яшь композитор Эльмир Низамов, ә сүзләрен Ренат Харис язган. 

Моннан 7 ел элек «Кара пулат» сәхнәдә куелган иде. Ә хәзер инде ул яңарып, кире кайта. Операның нигезендә Аксак Тимер гаскәрләре тарафыннан яндырылган 12 кыз турындагы риваять. Кара пулат – Болгардагы 14 гасыр уртасында төзелгән бина. Риваятьтә әйтелгәнчә, Кара пулат Болгар ханының хөкем итү урыны булган. Аның беренче катындагы бүлмәләрендә хөкем ителгән кешеләрне япканнар. 

«Нәргизә – бик көчле хатын-кыз. Аның каршында сөйгәнен җәзалаганда, ул үзен генә түгел, башка кызларны да яклый. Ул – фидакарь, туган җирен яратучы, зирәк хатын-кыз. Шушыларның барысын да операда мин җиткерергә тиеш», – дип бүлеште Татарстанның атказанган артисткасы, «Кара пулат» операсында Нәргизә ролен башкаручы Илүсә Хуҗина. Ә Турыбатырга килгәндә исә, аның ролен Илгиз Мөхетдинов уйнаячак. Операны тамашачылар 18, 19, 20, 21 һәм 22 май көннәрендә карый алачак.