КАМАЛ ТЕАТРЫ ЯНЫНДА НӘҮРҮЗ БӘЙРӘМЕ УЗА

23 мартта 12.00 сәгатьтән 15.00 сәгатькә кадәр Г. Камал театры янындагы мәйданда Нәүрүз бәйрәме узачак. Бәйрәмдә төрле төрки халыклар бер мәйданчыкта үз мәдәниятләре һәм традицияләрен тәкъдим итәчәк.

Бәйрәмдә традицион интерактив мәйданчыклар оештырылачак. Шулай ук төп сәхнәдә Татарстан халыклары ассамблеясының милли-мәдәни берләшмәләре коллективлары һәм чакырылган артистлар катнашында Күпмилләтле концерт программасы да каралган.

Кунаклар төрле төрки халыкларның рецептлары буенча әзерләнгән пловны татып карый һәм Нәүрүз халык уеннарында катнаша алачак. Бәйрәм кысаларында шулай ук «Нәүрүз гүзәле» матурлык бәйгесе дә уздырыла. Чарада кызлар милли костюмнарны тәкъдим итәчәк.