ГОРУРЛЫК ХИСЕ УЯТА ТОРГАН «МИЛЛИ ХӘЗИНӘ» ФЕСТИВАЛЕ

15 апрель көнне «Татар-информ» мәгълүмат агентлыгында «Милли хәзинә» балалар һәм яшүсмерләр өчен бөтенроссия халык иҗаты фестиваленә багышланган конференция узды.

Бәйге 2010 елда үз эшен башлап җибәрә һәм  еллар узу белән конкурсның катнашучылар географиясе зурая бара. Хәзерге вакытта фестивальдә мәктәп балалары, педагогик көллиятләрдә һәм төрле техникумнарда укучы студентлар да катнаша ала.

Быелгы конкурсның яңалыгы – оештыруда һәм матди яктан ярдәм күрсәтүдә яңа оешмаларның катнашуы. Татарстан Республикасының тарихи һәм мәдәни һәйкәлләрен торгызу фондына, «Туган авылым» милли-туристлык комплексына, Бөтендөнья татар конгрессы һәм ТР Рәисе каршындагы Мәдәниятне үстерүгә ярдәм итү фондларына КФУның Филология һәм мәдәниятара багланышлар институтының директоры, профессор Җамалетдинов Рәдиф Рифкать улы зур рәхмәтен җиткерде.

Конференция барышында вокал һәм уен кораллары буенча бәяләүнең төп билгеләрен «Бәйрәм» фольклор вокаль-инструменталь ансамбле җитәкчесе, Н. Г. Җиһанов исемендәге Казан консеваториясенең Опера студиясе хормейстеры Акбарова Гөлназ Наил кызы әйтеп китте. «Темага туры килү, халыкларның мәдәнияте, гореф-гадәтләрне белү, музыкаль әсәрне сәнгатьчә аңлату, интонация чисталыгы, сәхнә культурасы, тембр һәм тавыш көче, репертуарның катлаулылыгы, башкаручының мөмкинлекләренә туры килүе, башкару осталыгы исәпкә алына».

«Милли хәзинә» конкурсының йомгаклау туры 17-18 апрель көннәрендә КФУның Татарстан, 2 адресы буенча урнашкан бинасында узачак.