БЫЕЛ 7 УКУЧЫ ТУГАН ТЕЛДӘН ИМТИХАН ТАПШЫРА

Татарстанда быел туган телдән имтиханны 11 сыйныфны тәмамлаучы 7 чыгарылыш укучысы тапшыра. Ул 23 майда БДИның төп чорында узачак. Бу хакта Татарстан Республикасы Министрлар Кабинетында узган брифингта ТР Мәгариф һәм фән министры Илсур Һәдиуллин хәбәр итте. 
 
«Казаннан дүрт һәм Әтнә, Мөслим, Түбән Кама районнарыннан берәр чыгарылыш укучысы туган телдән имтихан тапшыру теләген белдерде. Узган ел бу имтиханны 8 кеше тапшырды, ә өченче ел – 1 укучы», – дип сөйләде Мәгариф һәм фән министрлыгы башлыгы.