«БИЗON»да «Я РЯДОМ. ЯРАТАМ» КҮРГӘЗМӘСЕ АЧЫЛА

23 мартта Казанның «БИЗON» заманча сәнгать галереясендә «Я рядом. Яратам» дигән таяныч һәм эмпатия күргәзмәсе ачыла. Күргәзмә дүрт яшь рәссам – Евгения һәм Саяна Байгалиева, Ирина Зюськина һәм Анна Лапшинова эшләрен берләштерәчәк.

Экспозициягә 60тан артык рәсем һәм арт-объект кертелгән. Аларда рәссамнар үзгәрешләр, куркынычсызлык, саклану, азатлык һәм шәхси чикләр турында уйлана. Авторлар тукыма һәм май белән генә түгел, ә башка материаллар белән дә эшләгән, әйтик, агач, балавыз, бетон, пыяла һәм фотопленка. Күргәзмәнең саундтрегы итеп Казан музыкантлары композицияләре сайланган.