ДИДЖЕЙ-СЕТ, ПОДКАСТ СТУДИЯСЕ ҺӘМ СВОП-МАРКЕТ: КАЗАНДА «СИН» КОНТЕНТ-ВЕЧЕРИНКАСЫ УЗАЧАК

27 августта 17:00 сәгатьтә Казанның «Фестиваль» бульварында «ПОВ» яшүсмерләр медиасы һәм «Ялкын» яшүсмерләр журналы оештырган «СИН» контент кичәсе узачак. Җәйне озату чарасында диджей-сет, мастер-класслар һәм кунаклар контент төшерә, подкаст яздыра һәм әйберләр белән алмаша ала торган махсус мәйданчыклар эшләячәк.

Кичәнең музыкаль программасында «БиЮ» кичәләре резидентлары – Choko, CRRNT һәм lizsold чыгыш ясаячак.

Бер үк вакытта биш зона эшләячәк. Подкаст зонасында кунаклар микрофон һәм камера каршында сорауларга җавап бирәчәк, ә мини-студиядә үзләрен яңалыклар чыгарылышындагы турыдан-туры эфир форматына охшатып яздыра алачак. Сораштырулар зонасында камерага үз фикереңне әйтергә, ә чилл-зонада ял итәргә мөмкин булачак.

Аерым мәйданчыкта своп-маркет эшләячәк. Биредә кунаклар шәхси әйберләре, китаплары, бизәнү әйберләре, үсемлекләре һәм башка нәрсәләр белән алмаша алачак. Катнашу өчен Telegram'да @dishsft аккаунтына шәхси хәбәр язарга кирәк.

Шулай ук мастер-класслар өчен аерым зона булачак: катнашучылар беләзекләр, 3D-стикерлар һәм журналлардан коллажлар ясаячак.

Кичә дәвамында кунаклар «контент-бинго» уенында да катнаша алачак. Карточкаларда төрле биремнәр булачак: диджейны видеога төшерергә, свопта берәр әйберне алмаштырырга, таныш булмаган кешегә комплимент әйтергә һәм мини-студиядә кадрга эләгергә.

Керү ирекле, алдан теркәлү кирәк.

ММЧ өчен элемтә:

Мантаева Томирис
Тел.: +7 (987) 214-14-06
Telegram: @tomamantaeva
E-mail: mantaeva.tomiris@mail.ru