7 ЯШЬЛЕК КЫЗ ЙОГА БУЕНЧА ИНСТРУКТОРГА УКЫГАН

Индиядә яшәүче 7 яшьлек мәктәп укучысы Праанви Гупте сертификатлы йога инструкторы булган. Дөньядагы иң яшь йога укытучысы дип аны Гиннесс рекордлар китабына да керткәннәр.

Кызның йога белән кызыксынуы 3 яшьләрдә башланган. Әнисенең йога белән шөгыльләнүен күреп, кыз да аңа ияргән. Йога дәресләрен узгач, кыз үзе дә укытырга теләвен аңлаган. «Йогага булган мәхәббәтне мөмкин кадәр күбрәк кешегә җиткерергә телим!» – дигән ул. Иң яшь йога укытучысы бу шөгыльне кечкенәләр һәм өлкәннәр өчен дә файдалы дип әйтә. Йога концентрацияне яхшыртырга булыша һәм сәламәт тормыш рәвешен алып барырга ярдәм итә.