ПОДЪЕЗДДА – КИТАП КИШТӘСЕ

«Татарстан командасы» җәмәгать инициативасы «БЕРГӘ УКЫЙБЫЗ» акциясе башлану турында игълан итә. Күршеләр белән уртак китап киштәсе булдырудан гыйбарәт ул.

---

Казанның Восстания урамындагы 43 йортта яшәүчеләр акциягә беренче булып кушылганнар. Аларның подъездында махсус китап киштәсе куелачак. Күршеләренә дә яраткан китапларын укытырга теләүчеләр аларны шул киштәгә тезәчәк хәзер.

Светлана Карпухина, йорт башҗитәге:

«Безгә мондый китап киштәсе күптән кирәк иде инде. Берәр кызык китап биреп тор әле дип, еш кына бер-беребезгә кереп йөрибез бит».

Леонид Лопухов, подъезд башҗитәге:

«Миңа калса, китаплар шактый җыелачак бу киштәдә. Күченеп китүчеләр дә, гадәттә, китапларын кая куярга белмиләр. Ул китаплар арасында шундый затлы сайланма әсәрләр дә очрый. Шулай әкрен генә бик шәп коллекция җыелыр дип уйлыйм».

Китаплар таралып, юкка чыгар дип курыкмый алар. Чөнки беләләр: үз куллары тигән, үз өлеше кергән эшләргә кешеләр сакчыл карый. Күптән түгел менә бергәләшеп ремонт ясаганнар, ишегалларында чәчәкләр утыртканнар.

Акциягә бик тиздән республикабызның башка йортлары да кушылыр дип ышанабыз. Ә нәрсә – шәп бит: әллә кайдагы библиотекага барып йөргәнче, уртак киштәдән генә алып кер дә укы.