«ГАРРИ ПОТТЕРГА РӘХӘТ, ИЧМАСАМ!»

Китәргә – калырга... Китәргә – калырга... Ромашканың таҗлары да бетеп китте, ә син һаман да бер фикергә килә алмыйсыңмы? Якыннарыңның киңәш-тәкъдимнәре, барысы бергә буталып, тәмам башыңны әйләндерә башлагандыр инде, име?

Шулай булмый ни! 9нчы класстан соң мәктәптә калыргамы, әллә инде мөстәкыйль тормышка аяк атларгамы икәнен хәл итү уен-муен эш түгел бит. Әгәр син Гарри Поттер укыган Хогвартс мәктәбендә эшләсәң һәм кемнең кая барасын хәл итә торган тылсымлы эшләпәгә (инглизләр аны гади генә Sorting Hat дип атый) ия булса-а-аң... Гарри Поттер кебек баш ватасың да булмас иде. Әмма син Гарри Поттер түгел, шуңа да үзеңә сайларга туры киләчәк. Ә юл күрсәтергә, үлчәү тәлинкәсенә плюс-минусларны салып торырга сиңа мин ярдәм итәрмен.

 

Кем акчасын кимерәсең?

9нчы класстан соң «икеле капчыклары» гына китә, дигән катып калган фикер яшәп килә. Калган стереотиплар кебек үк, монысын да чәлпәрәмә китерергә мөмкин.

Раилә Шәйдуллина Чистайның 2нче гимназиясендә «5»легә генә укыган, төрле чараларда актив катнашкан. Мөгаллимнәре өчен күз өстендәге каш булган, кыскасы. Һәм... 9дан соң аттестатын алган да, китеп тә барган. Бер начар гамәл дә кылмаган ул. Берәү дә китәргә мәҗбүр итмәгән аны. Хәтта күпләрнең котын алган БДИ да куркытмаган. Тизрәк мөстәкыйль буласы килгән кызның – шул гына. Көннәрнең берендә әнисе белән утырып киңәшкән дә, документларын икътисад, идарә итү һәм хокук институты каршындагы көллиятнең «хисапчы» бүлегенә илтеп биргән.

– Биш ел буе әти-әни җилкәсендә утырмавым белән горурланам. Классташларым югары уку йортларының беренче курсын тәмамлаганда, мин инде үзем акча эшли идем. Көллияттән соң читтән торып институтта белем ала башладым, анда да үз акчамны түләп укыдым, – ди Раилә.

Киткән дә, шуның белән мәктәбен хәтер сандыгына бикләп куйган түгел, билгеле. «Классташлардан аерылу бик авыр булды. Олылар проблемалары белән дә иртәрәк танышырга туры килде», – дип искә ала кичәге отличница. Шул сагынуга яисә авырлыкларга түзә алмыйча, күпмедер вакыттан соң кире мәктәпләренә әйләнеп кайтучылар да очрый икән. Раилә алай икеле-микеле сөйләшеп йөрмәгән. Моңа үкенми дә.

 

5 сумлык «стипа»

Тагын бер стереотип бар җәмгыятьтә – егетләргә югары белем булмаса да ярый. 9дан соң берәр училище-көллияткә кереп, «чын ир-ат һөнәре» алса, 5-6 ел буе вузда ыштан туздырып йөрүнең кирәге дә юк, имеш. Ә ни өчен кызлар алардан калышырга тиеш? Яки ни өчен вуз катыргысының егетләр шкафында ятарга хокукы юк әле? Күргәнегезчә, егет-кыз, «ботаник»-«икеле капчыгы» дип кенә бүлеп булмый монда.

Укытучы тәртипсез укучының тизрәк китүен зарыгып көтәдер. Әле үзем дә мәктәп партасында утырганда шулай дип уйлый идем. Тик мөгаллимнәрнең дә төрлесе бар икән. Берәүләр, шук балаларга олылар тормышы файдага гына булыр, дисә, икенчеләре, андыйлар мәктәптә озаккарак калса, үзләренә яхшырак булыр, дип фикерли.

Казанның 16нчы татар-инглиз гимназиясендә география укытучы Рәмзия Шәфигуллина, мәсәлән, 9нчы класстан соң киткән укучылар ота, ди. Үзенең кызы да шулай эшләгән булган. Шунысы кызык: Рәмзия ханым да китүнең төп плюсы дип баланың үзе акча эшли башлавын атады. Әлеге дә баягы БДИдан шүрләп китүчеләр дә юк түгел икән.

– Аның каравы, 11дән соң вузга керергә мөмкинлек күбрәк. Көллияттән соң югары уку йортына керәм, диючеләрнең сүзе күп очракта хыял дәрәҗәсендә генә кала. 11дән соң китүче егетләрнең армиягә бармый калу мөмкинлеге дә зуррак, – дип, калуның да уңай якларын санап китте укытучы.

Казан нефтехимия көллияте директоры Әсәдулла Садыйков үзләренең уку йортларында 9дан соң китүчеләрне дә, 11не тәмамлап килүчеләрне дә кабул итүләрен белдерде. Урта һөнәри белем алучыларга ‒ 476 сум, башлангыч һөнәри белем алучыларга 300 сумга якын стипендия түләнә. Моның белән генә бетми әле акчалы сөенеч. Дәүләт урта һөнәри белем алучыларга көненә 5 сум, башлангыч һөнәри белем алучыларга 40 сумга якын өстәмә акча бирә. Аңа укучылар йә ашарга, йә ай ахырында азык-төлек алырга мөмкин.

– Киңәштек тә хөкүмәтебез биргән акчага студентларны ашатырга булдык. Балалар үзләре шулай теләде, – ди Әсәдулла әфәнде.

Көллияткә, гадәттә, мәктәптә йомшаграк укыганнар килә икән. Гел «5»легә генә белем алган, тик югары уку йортына керергә мөмкинлеге булмаган авыл балалары да шактый, ди. 11нче классны тәмамлап килүчеләргә, өч ел көллияттә укыганнан соң, «Оргсинтез» ишекләре ачыла, Казан технология университетына керү мөмкинлеге дә бар.

– Шулай да мөмкинлеге булган ата-анага балаларын 11нче класска кадәр укытырга тәкъдим итәм. Үземнең балаларым зур инде хәзер. Мәктәп яшендә булсалар, 9дан китәргә рөхсәт бирмәс идем, – ди ТРның атказанган укытучысы, техник фәннәр кандидаты Әсәдулла Садыйков.

Әй, 10нчы классларның эше рәхәт, ичмасам. Китәргәме-калыргамы дигән тупиктан да чыкканнар, бердәм дәүләт имтиханы да Каф тавы артында булып тоела. Менә шул рәхәт чорга аяк басу өчен башта «9дан соң нәрсә эшләргә?» дигән сорауга җавап табарга кирәк. Алай ук авыр да түгел кебек инде үзе. Башыңдагы мең дә бер киңәш-тәкъдимнең илисен иләп, уйлыйсын уйлап бетерергә һәм актык карарны чыгарырга гына кирәк.

 

Әйтелгәннәргә нәтиҗә ясап, 9нчы класстан соң китүнең плюс-минусларын барлыйк.

Плюслар:

+ БДИдан котыласың;

+ техникум-көллиятләрнең барысында да диярлек стипендия түләнә;

+ яшьтәшләрең вузда укып йөргәндә, син һөнәри белем алып, үзең акча эшли башлыйсың.

 

Минуслар:

‒ вакытыннан алдарак мөстәкыйль тормышка аяк басасың;

‒ классташларыңнан аерылып, бер белмәгән кешеләр арасына чумасың;

‒ көллият-техникумнан соң вузга керәчәкмен, дип хыялланып йөрүчеләрнең күбесе, гадәттә, тагын ничәдер елын укуга багышларга иренә.

[gallery size="full" columns="2" ids="3623,3622,3620,3619"]

Нравится
Комментарии (0)
Осталось символов:
Шәп укыла
  • 21 сентябрь 2019 - 20:55
    НИГЕЗ ЙОРТ Сания карчыкның бәгыренә төшкән сагыш иксез-чиксез иде. Бу сагышны бер генә үлчәмгә салып та, бер генә бизмәнгә куеп та булмыйдыр. Ул аны гүя утырган эскәмиясенә мәңгелеккә беркетеп куйган да үзе башка җаннар эзләп китеп барган. Шуңа күрәдерме, Саниянең күңеленә авыр булса да, аның җаны тыныч иде...
    2368
    1
    48
  • 22 сентябрь 2019 - 14:14
    ВӘСИЛӘ Күпләр өчен мәктәпнең ямен алып китте Вәсилә апалары. Шул китүеннән башка килә алмады Вәсилә яраткан мәктәбенә. Авыр чир утыз ике яшьлек чибәр хатынны, аяктан яздырып, урынга беркетте. Көннән көнгә сүнә барды Вәсилә, корый барды. Хастаханәдә дә аңардан тиз баш тарттылар. Үзенә берни әйтмәсәләр дә, табиблар Вәсиләнең ире Ниязны ачыктан-ачык кисәттеләр: “Без ярдәм итәрлек түгел...” Бианасы Кәримә карчык киленен им-томлап та карады. Тик Вәсиләне аягыннан еккан авыр чир китәргә килмәгән иде шул. Айлар буе ятты да ятты урында Вәсилә. Берни аңламаган биш яшьлек кызы Ләйлә белән аңардан да кечерәк улы Фәрит кенә: “Әни, тор инде. Кайчан мәктәпкә барасың?”, - дип җанын кыйдылар.
    1806
    1
    23
  • 26 сентябрь 2019 - 15:08
    ПЕРӘ Вәсил бүген дә иртә таңнан, әнисе урыныннан кузгалып кыштыр-мыштыр йөри башлауга ук, йокысыннан торып утырды. Әнә ул инде кичтән үк әзерләп куелган утыннарны мичкә тутырып, ут үрләтеп җибәргән, сыерны савып кереп, сөтен дә сөзеп куйган. Менә хәзер самавырга чиләктән су салыр, торбасына яңа өлгергән кузлы күмерләрне өстәп җибәрер. Мичтә дөрләгән ялкынга, самавыр торбасы «тәрәзәчек»ләреннән күз кыскан кузларга карап утырырга ярата ул. Улының иртәләрен әнә шулай онытылып, утларны күзәтеп утыруын әнисе сизми диярлек. Сизеп тә игътибар итмиме? Комачауламагач, ярый, утырсын инде, ихтыяры, дияме?
    1704
    0
    12
  • 10 октябрь 2019 - 16:48
    ТУКТАЛЫШ “Тизрәк! Тизрәк!..” Кыска гына мизгелгә аңына килгән Айдар үз янында кайнашкан ак халатлы кешеләрнең кем икәнлеген дә, кая ашыкканнарын да аңламыйча, бөтен тәненә таралган кискен авыртудан тагын аңын җуйды... Тукталышта юл аша чыгарга басып торганда килеп бәрелгән машинаны ул хәтерләмәде. Изелгән аякларын бот төбеннән кисәчәкләрен белми иде әле утыз тугыз яшьлек авыл укытучысы...
    1531
    2
    22
  • 17 сентябрь 2019 - 10:59
    УКЫТУЧЫЛАР КӨНЕНӘ ШИГЫРЬЛӘР Шытым салып нәни йөрәгемә, Белем дөньясына озатучы. Һәр уңышым саен сөенүче Бары Сез ул, минем Укытучым!
    1441
    0
    0

  • 23 сентябрь 2019 - 15:32
    ЖВАЧКА: "БҮГЕН МИНЕМ ТУГАН КӨН!" Бүген без көненә берәр пачка чәйни торган ЖВАЧКАның туган көне. Аңа ничә яшь дип уйлыйсыз? Ничек уйлап тапканнар? Хәзер беләбез!
    129
    0
    0
  • 27 август 2019 - 11:02
    РОССИЯДӘ ШӘП ФИЛЬМ ТӨШЕРӘ БЕЛӘЛӘР! 27нче август – Россия кинематографиясе көне. Россиядә, Совет чорында төшерелгән фильмнарга карата шикләнеп караучылар шактый, әмма син андыйлардан булсаң, бу язманы ябып куярга ашыкма, чөнки Россия кинематографиясе “Ёлки”, “Притяжение”, “Бабушка лёгкого поведения” ише чүп-чардан гына тормый. Һәм без сиңа блогер Badcomedian фикеренчә иң яхшы 5 рус телле фильм тәкъдим итәбез!
    199
    0
    2
  • TAT CULT FEST 2019
  • ПИТРАУ-2019: КАРЕНДӘШЛӘР, АРУМЫ СЕЗ?
  • ПЕЧӘН БАЗАРЫ – 2019