ЛАНТРАТОВА МӘКТӘПЛӘРДӘ БАЛАЛАР ӨЧЕН ГАИЛӘ ТОРМЫШЫ ДӘРЕСЛӘРЕН КЕРТЕРГӘ ТӘКЪДИМ ИТТЕ

Россиядә кеше хокуклары буенча вәкаләтле вәкил Яна Лантратова мәктәп укучылары өчен гаилә тормышы дәресләрен, ә яшьләр өчен гаилә клубларын оештырырга тәкъдим итте. Аның фикеренчә, мондый чаралар Россиядә аерылышулар санын киметергә ярдәм итә ала.

9 июльдә Мәскәүдә, «Россия» милли үзәге мәйданчыгында, «Россия. Йөрәкләрне берләштереп» III Бөтенроссия туй фестивале узды. Шунда Лантратовадан, аның фикеренчә, илдә аерылышулар санын киметү өчен нәрсә эшләргә кирәклеге турында сорадылар.

Омбудсмен билгеләп үткәнчә, ел саен Россиядә кеше хокуклары буенча вәкаләтле вәкил институтына 415 мең кеше мөрәҗәгать итә. Аның сүзләренчә, мондый очракларда төп бурычларның берсе – кешеләр белән сөйләшү һәм аларны мәгълүматлы итү.

«Мин мәктәпләргә барганда, балалар белән аралашканда, күпләрнең бу мәсьәләне күтәрүен күрәм. Алар: “Мин гаилә корырга телим, ләкин әни булырга белмим, яхшы әни булу өчен нәрсә эшләргә кирәклеген аңламыйм: баланы ничек тәрбияләргә, ана булуга ничек әзерләнергә, булачак ирең белән мөнәсәбәтләрне ничек корырга?” – дип сорый. Бу бик мөһим. Чыннан да, “гаилә нәрсә ул, аны ничек корырга” дигән темаларга дәресләр кертү кирәк», – диде Лантратова журналистларга.

Аның сүзләренчә, балаларга гаиләнең шатлыклы мизгелләрне генә уртаклашу түгеллеген дә аңлатырга кирәк. Гаилә тормышында бер-береңә түземле булу, ишетә һәм тыңлый белү дә мөһим, дип саный ул.

«Үзара аңлашу – бик мөһим. Әлбәттә, әгәр гаилә клублары оештырылса – мин беләм, кайбер төбәкләрдә мондый тәҗрибә бар, анда яшьләр килеп, остазлар белән аралаша, бу өлкәдәге экспертлар чыгышларын тыңлый ала – бу да ярдәм итә ала», – дип ассызыклады Лантратова.