Логотип Идель
Бу – тема!

КЫЗЛАР КЕМНӘРДӘН ҮРНӘК АЛА?

Хәтерлисезме, журналыбызның февраль санында егетләрнең кумирлары турында сөйләшкән идек? Ә кызлар үзләренә үрнәк итеп кемне куя икән? Моның турында гүзәл затларыбызның үзләреннән сорадык. Әйдәгез, танышып китик.

Зәйнәп Имамиева, 13 яшь: «Аның гел югарыга омтылуы һәм үҗәтлеге һәркемне таң калдыра»

Күптән түгел генә үзем өчен яңа спорт төрен ачтым: фигуралы шуу белән кызыксына башладым. Хәзер кичләрем апам белән бергәләп төрле ярышлар карап үтә. Әлеге спорт төрендә мине үзенә җәлеп иткән беренче спортсмен нәкъ тә Камилә Вәлиева булды. Ул күп кенә ярышларда олы үрләргә ия булуы белән бөтен дөньяга танылган шәхес булып тора. Аның гел югарыга омтылуы, үҗәтлеге һәм түземлеге һәркемне таң калдыра. Мин дә Камилә кебек киләчәктә зур үрләр яулар өчен бүгеннән үк бар тырышлыгымны куям.

Миләүшә Фәләхиева, 15 яшь: «Аның иҗаты – замана һәм күңел тавышы»

Җыр дөньясына гашыйк кеше буларак, үземнең кумирым итеп, җырчы Fedukны (Фёдор Инсаровны) мисалга китерә алам. Аның иҗаты – замана һәм күңел тавышы. Үзем инде аны күптәннән яратып тыңлыйм һәм тыңлаган саен үземә көч туплыйм. Аеруча «Краски» җыры күңелемә якын ята. Мин үзем дә, җай чыккан саен, гитара кылларында уйнап, матур-матур җырлар башкарырга яратам. Дусларыма һәм туганнарыма минем иҗатым ошый, ә бу минем өчен кумирым тәэсирендә ирешелгән зур уңыш булып тора.

Зәлинә Мөхәммәтова, 15 яшь: «Күп кенә кешеләр аннан үрнәк алып, Аллаһы Тәгаләгә якыная»

Минем өчен үрнәк кеше ул – Айгөл апа Инфина (Гатауллина). Ул күп кенә мохтаҗ кешеләргә һәрдаим ярдәм кулы суза, аларга таяныч һәм терәк була. Айгөл апа белеме буенча юрист булса да, бүгенге көндә визажист булып хезмәт куя. Күп кенә кешеләр, аннан үрнәк алып, Аллаһы Тәгаләгә якыная: яулык ябалар, намаз укый башлыйлар, дин юлына басалар. Киләчәктә Айгөл апа кебек үк визажист булмасам да, күп кенә сыйфатларда аңа охшыйсым килә.

Диләрә Агелова, 17 яшь: «Ул үткәргән остаханәләрдә катнашып карыйсым килә»

Мин балачактан ук сәнгать дөньясында кайныйм. Бию исә тормышымда аерым бер урын алып тора, кумирым Ева Уварова да шул өлкә белән бәйле. Нәкъ тә аның аша күп кенә бию төрләрен белдем, хәтта «контемпорари» стилендәге иҗат җимешләрен кабатлап караганым да бар. Ева үзенең төгәл характеры һәм күпкырлылыгы белән мине үзенә җәлеп итте. Киләчәктә исә кыз белән шәхсән танышып, ул үткәргән остаханәләрдә катнашып карыйсым килә.

Камилә Әхмәтова, 13 яшь: «Киләчәктә аның кебек танылган актриса буласым килә»

Минем киләчәктә төрле фильмнарда төп рольләрне уйныйсым килә. Бу теләгем, миңа калса, Рәсәй актерларының сәнгате белән кызыксынуымнан башлангандыр. Шундый сокландыргыч шәхесләрнең берсе –  Валентина Ляпина. Үзе башкарган барлык рольләрне дә ул бар көчен биреп сәхнәләштерә ала. Аеруча «Юность» сериалындагы әйдаман ролен ул бар җаны-тәне белән башкара. Аннан кала, Валентина «Ералаш», «Бременские музыканты», «Руки вверх» һәм башка кызыклы фильм һәм сериалларда уйный. Минем дә киләчәктә аның кебек танылган актриса буласым килә.

 

Следите за самым важным и интересным в Telegram-каналеТатмедиа

Нет комментариев