ЕГЕТЛӘРДӘ КӨНЧЕЛЕК БАРМЫ?

Барыгызның да диярлек көнчелек хисе белән очрашканы бардыр. Гади сүз белән әйткәндә, көнчелек син теләгән әйбернең, синдә түгел, ә башка берәүдә булу аркасында барлыкка килә. Мәсәлән, кызлар башка кызларның яңа күлмәгенә, матур фигурасына, бетчәсез битенә, бөдрә чәчлеләр туры чәчлеләргә, туры чәчлеләр бөдрә чәчлеләргә көнләшә. Һәм бу исемлекне бик озак дәвам итеп була. Ә егетләр нәрсәгә кызыга, ниләргә көнләшә икән? Әлеге кызык сорауны егетләрнең үзләренә бирдек. Әйдәгез, җавапларын укып китик. 

Фирнат, 19 яшь:

– Дустыңа/танышыңа карата көнчелек хисе туган бармы?

– Машинасыз егетләр машина булганнардан көнләшә инде. Бер танышым да озак кына эзләгәч, алып куйды. Әйе, үз чиратымда, минем дә хыялымда машина бар, чөнки башка кешеләр алдында автомобильле кешенең билгеле бер абруе, өстенлек хисе бар. Мин танышым өчен бик шат, аның күптәнге хыялы иде бит, ләкин күңелдә барыбер көнчелек хисе бар.

Аңа карамастан, көнчелекне начар дип саныйм. Аны җиңү өчен үз өстеңдә эшләргә кирәк. Мин танышым урынына үземне куеп карыйм һәм ул үз машинасын нинди тырышлык белән алганын искә төшерәм. Шул чакта гына көнләшүнең кирәксез икәнлеген аңлыйм.

Әнвәр, 17 яшь:

– Дөресен генә әйткәндә, үземне көнче кеше дип санамыйм. Дустым берәр уңышка ирешә икән, мин аның өчен шатланам. Әмма бүгенге көнгә кадәр хәтеремдә сакланып калган бер вакыйга бар. 5-6 сыйныфларда укыган чак иде. Җәй ахыры, тиздән сентябрь, уку елы башлана... Иң якын дустым үзенә соры төстә портфель сатып алган. Һәм ул әлеге сумканы күрсәтергә дип мине өенә чакырды. «Менә шундый кесәләре бар, монда хәтта ноутбук та салып була», – дип сөйли башлады. Моңарчы мондый сумкаларны күргәнем юк иде, бәлки шуңа көнчелек хисе тугандыр да. «Матур булган, котлыйм», – дип әйттем инде әйтүен. Әмма бу чын күңелдән әйтелгән сүзләр түгел иде...

Риназ, 13 яшь: 

– Әйе, бар. Мәсәлән, таныш малайга әти-әнисе текә мопед алып бирде. Мин дә аның турында хыяллана идем. Бу кара көнчелек түгел, киресенчә, миңа этәргеч кебек. Мин көнләшеп кенә калу түгел, ә үз максатыма ирешү юлында. Җәйгә кадәр мопед алырга акча эшләрмен дип ышанып калам.

Илнур, 17 яшь:

– Мин хәзерге вакытта еш кына үз торагым турында уйланам, мөстәкыйль яшисем килә. Кемгәдер мирас буенча фатир эләгә яисә әти-әниләренең финанслары яхшы була. Мондый бәхетлеләр яшәү өчен акча табу турында кайгырмый, аның урынына белем ала яки үзләре яраткан эшләрендә уңышларга ирешә. Көнчелекме бу – белмим, әмма миңа моннан моңсу. Сәер яңгырар, тик бу кемдәдер боларның барысы да булганга түгел, ә нәкъ менә миндә булмаганга дип уйлыйм.