16 ЯШЬЛЕК КЫЗЫМ ЯУЛЫК ЯБАМ, ДИ...

«Без – гади татар гаиләсе. Ислам дине кануннарын төгәл үтәп яшибез дип мактана алмыйм. Күптән түгел 16 яшьлек кызым, яныма килеп: «Әни, мин яулык ябарга булдым», – диде. Догалар ятлый башлады. Мин аптырашта. Нәрсә уйларга да белмим. Бер яктан сөенергә генә тиешмен кебек. Начар юлдан китмәгән бит, дингә басарга уйлаган... Икенче яктан, мин куркам. “Берәр сектага эләкмәгәнме?” дип, бик борчылам. Кызым үзе моны кире кага. «Әллә нәрсәләр уйлап чыгарасың», – ди... Нишләргә дә белмим. Киңәш бирегезче...»
Аноним

Сания, 55 яшь:
– Заманында мин дә нәкъ шундый хәлдә калган идем. 15 яшьлек кызым кинәт кенә яулык ябарга карар кылды. Мин каршы булдым. Мәктәпкә ничек йөрер, спорт ярышларында ничек катнашыр, дип борчылдым. Гомумән, дусларыннан аерылып торачагын күтәрә алмадым. Атна буе талашканыбыз хәтердә. Тик нәтиҗәдә мин уемнан кире кайттым. Балам белән мөнәсәбәтләремне бозасым килмәде. Шулай итеп, ул яулык ябып йөри башлады, намазга басты. Аллага шөкер, барысы да яхшы тәмамланды. Дуслары да ничектер тыныч кабул иттеләр, бармак белән төртеп, көлеп йөрүчеләр булмады. Хәзер кызыма 28 яшь инде. Мөселман егетенә кияүгә чыгып, матур гына яшиләр. Ике оныгым бар. Үзем дә күптән түгел намазга бастым, ураза тотам. Ул чорда кызымның иманын сындырмавыма бик сөенәм.

Флюра Әхмәтова, гаилә мөнәсәбәтләре буенча психолог:
– Яшүсмерлек чорында һәр бала «Мин кем?» дигән сорауга җавап эзли. Кайберәүләр депрессиягә охшаш халәттә үз эчендә казынса, башкалар, киресенчә, «Менә бит мин!» дип, дөньяга үз-үзләре турында хәбәр итәргә, ничек тә булса үзләрен күрсәтергә тырыша. Сезнең очракта исә, әлбәттә, кыз белән сөйләшми торып, хәлнең асылын аңлавы кыен. Шулай да, уйлап карасак,
монда ике вариант булуы мөмкин. Беренчесе – модага бирелү. Хәзер бит кыска итәкләр, үкчәле туфлиләр, ачык аркалар модада түгел. Кызлар киң киемнәр кияләр, берсеннән-берсе матур, зәвыклы яулыклар бәйлиләр. Бәлки, аның да үзен шушы стильдә күрәсе киләдер... Хәер, сез кызыгызны догалар өйрәнә башлады, дисез. Шулай булгач, икенче вариант – дини контекст – сезнең очракка күбрәк туры килә. Иң мөһим киңәш: бала белән мөнәсәбәтләрне югалтмагыз! Ничек кенә каршы булсагыз да, сез һәрвакыт бала яклы булырга тиеш. Күбрәк аралашыгыз, сөйләшегез, сораулар бирегез. Бәлки, сезгә дә кызыгыз белән бергә дин юлына басарга вакыт җиткәндер. Мәсәлән, догаларны бергәләп ятларга мөмкин. Шул рәвешле, гаиләдә бүленешне булдырмый калачаксыз. Алай гына да түгел, бу – кызыгыз белән араларны якынайту өчен менә дигән мөмкинлек.
Секта мәсьәләсенә килгәндә, андый куркыныч янау-янамавын аңлау өчен аралашырга, аралашырга һәм тагын бер кат аралашырга кирәк. Әгәр дә инде бик борчыласыз икән, сак кына аның телефонда кемнәр белән аралашуын карарга мөмкин. Хәер, минемчә, бу – секта ише төркемнәр белән бәйле түгел. Кыз бары тик дөньяга үзе турында белдерергә генә тели. Иң мөһиме, аның карарын бетереп ташламагыз, көлмәгез, басым ясамагыз. Әлбәттә, үз фикерегезне әйтергә мөмкин. Тик ул бары тик фикер генә булып калырга тиеш

Иң мөһим һәм кызыклы язмаларны Татмедиа Telegram-каналында укыгыз


Нравится
Комментарии (0)
Осталось символов:
Шәп укыла
  • 27 март 2020 - 10:08
    ПАР БЕЛӘЗЕК Зөлхиҗҗә иртәгесен туган-тумача, дусларын, тирә-күршеләрен җыеп Коръән мәҗлесе уздырырга әзерләнә иде. Киләсе кунаклар инде чакырылган. Бик озак урын хастасы булып яткан әнисенең бакыйлыкка күчкәненә ике ел узып та киткән. Хәергә өләшәсе йомшак ак сөлгеләре күптән түрдәге тумбочка өстенә таслап куелган. Зөлхиҗҗә әнисе исән чакта да аңа гел ак төстәге күлмәкләр, яулыклар гына ала иде. Биш ел урында ятты карчык.
    4669
    0
    88
  • 18 март 2020 - 15:36
    ТӘҮГЕ МӘХӘББӘТ Ә мәхәббәт дигәнең буйга-сынга карыймы соң? Ул бит буйга гына түгел, яшькә дә карамый. Мәхәббәт үтмәслек киртәләр юк. Ә тәүге сөю бигрәк тә...Ә Зөлфәтнең йөрәгендә әле бу саф тойгының бөреләнеп чәчәк атар чагы гына. Унҗиде яшь... Гомернең иң матур, иң кадерле чагы икәнлеген без бик күп еллар үткәч кенә аңлыйбыз шул. Мәңгегә шулай яшь, матур, дәртле булырбыз кебек.
    3722
    0
    33
  • 24 март 2020 - 16:21
    ҮЗ ЯЛГЫШЫМ, ҮЗ ЯЗМЫШЫМ Рәмилә, уйларыннан арынып, наушнигын салды да кызының бүлмәсенә керде. Индира скайптан Марс белән аралаша иде. Шулай да әнисен күргәч, экранны сүндереп куйды. Рәмиләнең Хәбир турында бик сорыйсы килә иде. Әмма сүзне башка яктан башлады: “Син, кызым, дәү әниең белән алай дорфа сөйләшмә, ярыймы. Ул бит сиңа яхшылык кына тели”. Әнисенең бу сүзләре ачуын китердеме, Индира йөзен чытты: “Әни, син ул җен карчыгына буйсынып, үзеңне ирдән, мине әтидән яздырдың! Сез икегез дә аның корбаны!
    3604
    0
    36

Блоглар
  • МУСА ҖӘЛИЛ ИСЕМЕНДӘГЕ КӨРӘШ ЯРЫШЛАРЫ-2020 (ФОТОРЕПОРТАЖ)
  • CLUBTURBO WINTER DRIFT CUP ИКЕНЧЕ ЭТАП: ФОТОРЕПОРТАЖ
  • «ӘЙДӘ, ШАЯРТ»: ФИНАЛ
  • ТАТАР ИҖАДИ КОМАНДАЛАРЫ АРАСЫНДА МИНИ-ФУТБОЛ
  • РУБИН–ДИНАМО 0:1 (ФОТОРЕПОРТАЖ)
  • TAT CULT FEST 2019
  • ПИТРАУ-2019: КАРЕНДӘШЛӘР, АРУМЫ СЕЗ?
  • ПЕЧӘН БАЗАРЫ – 2019