«ХАНУМА»: КАРИЕВ ТЕАТРЫННАН – ЯҢА МУЗЫКАЛЬ КОМЕДИЯ

27 гыйнварда Кариев театры «Ханума» музыкаль комедиясен тәкъдим итәчәк. Спектакльнең режиссеры – Ренат Әюпов. Грузин драматургы Авксентий Цагарели пьесасы Илдус Әхмәтҗанов тәрҗемәсендә куелачак.

Бай сәүдәгәр Микич Котрянц дворян титулы алырга хыяллана. Кызы Сонаны бөлгенлеккә төшкән кенәзгә кияүгә бирү – җәмгыятьнең югары катламына күтәрелү мөмкинлеге. Сонаның йөрәген исә француз теле, җыр һәм бию укытучысы – Котэ яулый. Яшьләр бер-берсенә гашыйк булалар. Тик, кавышканчыга кадәр, аларга ике димче – Кабато һәм Ханума – тартышуын үтәргә кирәк. Гаилә бәхетенә ирешү өчен, саф хисләргә бирелгән пар моңарчы кыймаган гамәлгә барачак, бу – чын мәхәббәткә дәлил түгелме?.. Спектакльнең яшь чикләве 16+.

Ренат Әюпов әйтүенчә, «Ханума» музыкаль комедиясендә Гия Канчелиның 12 грузин җыр партиясе яңгыраячак. «Җырлары үтә катлаулы, ләкин тыңларга рәхәт!» – дип ышандыра режиссер.