ТАТАРСТАНДА ПЕДВУЗ СТУДЕНТЛАРЫ МАКСАТЧАН СТИПЕНДИЯДӘН БАШ ТАРТА

Татарстандагы педагогика югары уку йортларында студентлар ай саен 15 мең сум күләмендә түләнә торган максатчан стипендиядән ешрак баш тарта башлаган. Сәбәбе – программаны тәмамлагач, авыл мәктәпләрендә биш ел эшләү мәҗбүрияте. Бу хакта Татарстан Дәүләт Советының 25 нче утырышы кысаларында депутат Игорь Бикеев сөйләгән.

Аның сүзләренчә, булачак укытучылар озак вакытка эш урыны белән бәйләнергә теләми һәм шуңа күрә максатчан уку урынына гадәти бюджет урыннарын сайлый.

Татарстан мәгариф һәм фән министры Илсур Һадиуллин да бу проблеманы раслаган. Элегрәк әлеге программа буенча 647 гә кадәр студент белем алган. Ул районнардагы математика, физика һәм рус теле укытучылары җитмәү мәсьәләсен хәл итәргә ярдәм иткән.

Министр сүзләренчә, соңгы вакытта бюджет урыннары саны арту сәбәпле, абитуриентлар һәм студентлар нәкъ менә аларны ешрак сайлый. Ә максатчан программада катнашучылар укуны тәмамлагач, үзләрен укырга җибәргән муниципаль районда биш ел укытучы булып эшләргә тиеш.

Хәзер республика бу программаның шартларын үзгәртергә һәм камилләштерергә планлаштыра.

Һадиуллин шулай ук Татарстан Дәүләт Советының педагогика югары уку йортларын тәмамлаучылар өчен өч еллык мәҗбүри эшләү тәртибен кире кайтару турындагы мөрәҗәгатен Дәүләт Думасы хупламавын әйткән.

Шуңа бәйле рәвештә, Татарстан ел ахырына кадәр яшь укытучыларны мәктәпләрдә калдыру өчен үзенең төбәк дәрәҗәсендәге чараларын эшләргә ниятли.