COVID-19 ИНТЕЛЛЕКТ ДӘРӘҖӘСЕН КИМЕТӘ

COVID-19 белән авырганнарның интеллект дәрәҗәсе авыру кичермәгән кешеләрнекенә караганда түбәнрәк, дип ачыклаган Британия белгечләре. Иң зур аерма концентрацияне һәм фикерләүне таләп итә торган биремнәрне эшләгәндә күренгән. Авыру никадәр начар үтсә, кешенең баш мие дә шулкадәр начаррак эшли.

Бу яман авыру, психик һәм неврологик проблемаларга китереп, баш миен зарарларга сәләтле. Лондонның Империя көллияте белгечләре ачыклаганча, COVID-19ны кичергән кешенең когнитив сәләтләренә тискәре йогынты ясала икән. Тикшерүчеләр 2020 елның гыйнварыннан алып декабренә кадәр интеллектка тест узган 81 337 катнашучыны анализлаган. 12 689 кеше хәбәр иткәнчә, алар COVID-19ны төрле дәрәҗәдәге авырлыкта кичергәннәр. Нәтиҗә шундый: COVID-19 белән авырган кешеләр сәламәт кешеләр белән чагыштырганда интеллектка тестны начаррак үтәгән.