«ӘЛБӘДӘН» ФЕСТИВАЛЕ: ТЕХНИКА, МАХСУС ДЕКОРАЦИЯЛӘР ҺӘМ ТУЛЫСЫНЧА ТАРИХКА ЧУМУ

22-23 июнь көннәрендә «Әлбәдән» тарихи реконструкция фестивале көтелә. Фестиваль инде алтынчы тапкыр Брест ныгытмасын саклауда катнашкан Советлар Союзы Герое Петр Гавриловның туган ягында – Питрәч районы Әлбәдән авылында оештырыла.

Чара 350дән артык катнашучы һәм 10 меңнән артык кунакны бер җирдә җыячак. Бирегә Россиядән генә түгел, башка илләрдән дә килүче катнашучылар булачак дип көтелә.

Чара Бөек Ватан сугышы геройларын хәтердә тоту, алар белән яшь буынны таныштыру, каһарманнарның батырлыгын кабаттан искә төшерү ниятеннән чынга ашырыла. Фестиваль өчен махсус декорацияләр ясалган, биредә күп тарихи техника катнашачак. Моннан тыш, чарада концерт номерлары, чәй белән сыйлану да каралган.

Фото: «Татар-информ» мәгълүмат агентлыгы