РЕТРОТРАМВАЙ ЭЧЕНДӘ - WI-FI!

Казанлылар өчен тагын бер яңалык! Хәзер Казанда 80нче еллардагы трамвайда йөреп була! Маршрут тимер юл вокзалыннан алып елга портына кадәр дәвам итә. 35 минутлык сәяхәт кесәне 200-300 сумга такырайта.

Әлеге ретротрамвай 1986 елда чыгарылган. Элек ул вагон-ресторан булган. Бу транспорт милли рухта бизәлгән: “башына” түбәтәй “кигән”, алдына бабай йөзе төшерелгән.

Ретротрамвай эчендә татар музыкасы уйный. Өстәлләрдә шәһәр картасы куелган. Хәзерге вакытта бу транспорт пәнҗешәмбе-якшәмбе көннәрендә эшли. Трамвайда 10.00-22.00 сәгать аралыгында йөреп була. Сәяхәт дәвамында, җиде телнең берсен сайлап, аудиогидны тыңларга мөмкин. Транспорт эчендә wi-fi да эшли.