Хатыйп Миңнегулов: Татар теле аркылы мирасыбызга юл ачыла

Танылган әдәбият галиме, педагог, дәреслекләр авторы, тәнкыйтьче  Хатыйп Миңнегулов татар теле турында: 

– Төрекләр, казахлар, төрекмәннәр арасында мин үзебезнең татарчам белән йөрим. Чөнки без бер-беребезне 70 процентка аңлыйбыз. Татар телен өйрәнү ул гадәти, тар күренеш түгел – аның аркылы мирасыбызга юл ачыла. Әгәр без татар язма телен беләбез икән, үзбәк, әзәрбайҗан әдипләренең әсәрләре белән таныша алабыз. Габдулла Тукай, Галимҗан Ибраһимов башка төрки халыкларның язучы-шагыйрьләренә зур йогынты ясый. Алар безнең Тукайны, Ибраһимовны үзләренең укытучылары дип саный.

Заманында Россия империясе дә, Көнчыгыш халыклары белән аралашкан вакытта, татар телен дипломатия, аралашу теле иткән. Татар теле янә үз вазифасын күтәрәчәк. Татар телен өйрәнү дөньяга карашыбызны үзгәртәчәк, интеллектыбызны үстерәчәк, алга барырга ярдәм итәчәк.