«КАЗАН МАРАФОНЫ»: АРСЛАНХАН ӨЧЕН 10 ЧАКРЫМ ПҮЧТӘК КЕНӘ!

«На старт! Внимание! Марш!» 21 май көнне «Казан марафоны»нда катнашачак һәркем бу сүзләрне зарыгып көтә. Тырыша-тырыша күнекмәләр уздырган марафончылар арасында яшь спортчылар да бар! Арсланхан Хисамов – шундыйлардан.

Исеме: Арсланхан Хисамов

Яше: 16

Укый: Казанның 167нче мәктәбенең 9 сыйныфында

Яраткан фәннәре: математика, химия, физика

Шөгыле: каратэ кекусинкай

– Арсланхан, әйт әле, син ничәнче сыйныфтан бирле марафоннарда катнаша башладың?

– Беренче тапкыр мондый спорт чараларында 14 яшемдә катнаштым. Мин йөгергән тәүге марафоным 2016 елның май аенда узды. Ул «Казан марафоны» иде. Анда мин 3 чакрымлык араны уздым.



– Быел ничә чакрымлык дистанцияне сайлап алдың?

– 21 майда узачак быелгы «Казан марафоны»нда мин 10 чакрымлык араны йөгерәчәкмен.

– Марафонга әзерләнү серләрен безгә дә чиш әле? Анда йөгерү өчен нинди күнекмәләр ясый идең?

– Мин марафонда катнашыр өчен генә әзерләнмәдем. Чөнки минем күнекмәләр даими рәвештә ел дәвамында уза. 2016 елның яз аеннан башлап, ким дигәндә, атнасына бер тапкыр чабам. Гадәттә, атнага 2-3 тапкыр йөгерәм. Күнекмәләр вакытында мин чыдамлылыгымны ныгытам, урманда, паркларда 3-10 чакрым араны чабам.

– Синең бит әтиең дә спортчы әле. Ул да «Казан марафоны»нда катнашамы?

– Әйе, минем әтием Олег Хисамов – карате кекусинкай дигән спорт төре буенча тренер. Шушы спорт төре буенча 4нче разрядка ия. «Казан марафоны»нда 21,1 чакрым араны йөгерәчәк.

– «Казан марафоны»ннан кала, тагын нинди марафоннарда катнашканың бар?

– Былтыр ноябрь аенда Мәскәүдә Брюс Ли туган көненә багышланган йөгерештә катнашып, 10 чакрым араны чаптым. Шулай ук Яр Чаллы шәһәрендәге «Кама ярыммарафоны»нда 4 чакрымны йөгереп уздым.



– Быел «Казан марфоны»нда 10 чакрым араны күпме вакыт эчендә йөгереп килергә уйлыйсың?

– 60 минутта, дип өметләнәм.

– Марафоннарда катнашу сиңа нәрсә бирә?

– Миңа йөгерү процессы ошый. Марафон атмосферасының никадәр шәп икәнлеген сүз белән генә аңлатып булмый. Башкалар белән бер дулкынга кушылып йөгерү миңа алга таба барырга этәргеч булып тора.



Алинә МИННЕВӘЛИЕВА