ИҢ ШӘП ЯШЬ ИНСПЕКТОР КАЙДА ЯШИ?

Юлларда олы абыйлар гына юл-патруль хезмәте инспекторы булып эшли дисәң, бераз ялгышасың. Чөнки аларга ярдәмгә яшь инспекторлар да килә. Егет-кызлар юллардагы тәртипне сакларга булыша, юл хәрәкәтендәге иминлек өчен көрәшә.

Яшь инспекторларның үз конкурслары да бар: «Куркынычсыз тәгәрмәч» – шундый бәйгеләрнең берсе. Республика күләмендә уздырылган бу бәйгедә быел 232 яшь инспектор ярышты. Татарстанда бәйге Яр Чаллы шәһәрендә узды.



Чаллыга конкурсның район һәм шәһәр этапларында җиңү яулаган катнашучылары җыелды. Алар шәхси һәм команда исәбендә ярышты. Юл йөрү кагыйдәләрен белү, һәлакәтттә зыян күргәннәргә беренче ярдәм күрсәтү, автошәһәрчектә велосипед белән идарә итү – катнашучыларга боларның барысы да «5»ле билгесенә үтәргә кирәк булган. Моннан тыш, егет-кызлар сәләтләрен иҗади конкурста да сынаган.



Нәтиҗәдә, призлы урыннарны түбәндәге командалар яулаган:

1. Казан шәһәре Яңа Савин районының 177нче мәктәп командасы;

2.Казан шәһәре Совет районының 159нчы мәктәп командасы;

3.Яр Чаллы шәһәренең 46нчы мәктәп командасы.



Яшь инспекторлар, юл йөрү кагыйдәләрен бозмас өчен, юлларда үзеңне ничек тотарга кирәклеген җәяүлеләр һәм велосипечыларның да исләренә төшерә.