УКУЧЫЛАРЫБЫЗ ИҖАТЫ - Эльвина Кириллова

Түбән Кама шәһәре 29нчы мәктәбенең 2нче сыйныф укучысы Кириллова Эльвина безгә үзенең беренче шигырьләрен тәкъдим итә. Әлегә кадәр Эльвина төрле шигырь сөйләүчеләр бәйгеләрендә катнашкан.

Зифа каен

Ак шәлен бөркәнгән дә,
Утыра зифа каен.
Көн артыннан көн үтә, диеп,
Көтә ул һәрбер таңын.

Салкындыр, дип, мин кызганам
Урамдагы каенны.
Зифа каен, түз әз генә,
Каршыларбыз без язны.

Болында йөрим

Рәхәтләнеп йөрим болында,
Чәчәк җыям кочак-кочак.
Шул чәчәкләр арасына
Кереп качам уйнап, кайчак.

Исләрен бик яратам мин
Андагы үләннәрнең.
Табигатькә каян килгән
Чәчкәләрнең төсләре!

Күреп күзләрең туймаслык
Мондагы матурлыкка.
Сокланам да туктап калам
Күңелдәге шатлыкка.