№189 ГИМНАЗИЯДӘ «АЛДЫНГЫЛАР ХӘРӘКӘТЕ» СОВЕТЫ СОСТАВЫНА САЙЛАУЛАР УЗДЫ

Казан шәһәренең 189 нчы «Заман» гимназиясендә «Алдынгылар хәрәкәте»нең беренчел оешмасы советы составына сайлаулар узды. Әлеге чара укучыларның мәктәп тормышында актив катнашуын, үз фикерләрен җиткерү һәм инициативаларын тәкъдим итү мөмкинлеген биргән мөһим вакыйга булды.

Чарада гимназия укучылары, укытучылар һәм әти-әниләр катнашты. Кунаклар арасында Татарстан Республикасы Рәисе ярдәмчесе, Татарстан Республикасында «Алдынгылар хәрәкәте» төбәк бүлеге җитәкчесе Тимур Сөләйманов, Казан шәһәре бүлекчәсе җитәкчесе Динар Бариев һәм Киров, Мәскәү районнары буенча «Алдынгылар хәрәкәте» кураторы Александра Рукавишникова да булды.

Сайлаулар алдыннан кандидатлар үзләренең программалары белән таныштырдылар, гимназия тормышын үстерүгә кагылышлы тәкъдимнәрен җиткерделәр. Аннан соң ачык дебатлар узды. Укучылар кандидатларга төрле сораулар бирделәр, алар үз фикерләрен якладылар, киләчәктә башкарырга теләгән эшләре һәм инициативалары турында сөйләделәр.

Дебатлар барышында Тимур Сөләйманов та укучыларның сорауларына җавап бирүдә катнашты, кандидатларга теләктәшлек белдерде һәм яшьләрнең актив булуы, үз фикерен әйтә белүе, җаваплылык алырга өйрәнүе мөһимлеген ассызыклады.

«Алдынгылар хәрәкәте» вәкилләре билгеләп үткәнчә, мондый сайлаулар укучыларда гражданлык активлыгы, лидерлык сыйфатлары һәм уртак эш өчен җаваплылык хисе формалаштыруга ярдәм итә.

Гимназия директоры да әлеге башлангычны хуплады, сайланган укучыларга уңышлар теләде һәм аларның мәктәп тормышын үстерүгә, яңа проектлар һәм инициативалар тормышка ашыруга зур өлеш кертәчәген билгеләп үтте.

Дебатлардан соң гимназиядә яшерен тавыш бирү узды. Аның нәтиҗәләре буенча «Алдынгылар хәрәкәте» советы составына керәчәк укучылар сайланды. Яңа составка мәктәп укучыларының мәнфәгатьләрен яклау, кызыклы чаралар һәм проектлар оештыру, гимназия тормышын тагын да актив итү бурычы йөкләнә.