СУШИ-ТОРТ РЕЦЕПТЫ

Суши, роллылар ашарга һәркем ярата. Ләкин гел кафе-рестораннарда йөреп булмый бит. Өйдә тәмле һәм җиңел ясала торган суши ашыйсыгыз килә икән, бу рецепт сезнең өчен. Духовкада пешә торган запеканка рәвешле суши-торт!

1. Түгәрәк дөгене суда пешереп сөзәбез. Ул изелеп бетәргә тиеш түгел. Форманың төбенә иң беренче шуны җәябез.
2. Краблы таякчыкларны турыйбыз яисә кул белән җепселләргә бүлгәлибез дә, майонез яки эремчекле (творожный) сыр белән бутыйбыз. Дөге өстенә сылыйбыз. Бу этапта, бик бай булсагыз, кызыл балык та турап өстәргә була.
3. Гади кибетләрдә сатыла торган соуслы икраны, кырылган сыр, сарымсак һәм майонез белән бутыйбыз. Бу – киләсе катлам булачак.
4. 20 минутка 180°С духовкага пешергә куябыз. Сырлы катлам матур булып кызарып чыгачак.
5. Алгач өстенә бераз терияки соусы һәм кунжут сибеп бизибез.
6. Суши зурлыгында бәләкәй кисәкләргә бүлеп, нори яфрагына кашык белән алып куеп, тәмләп ашыйсы гына калды.
7. Барсы да бик гади һәм җиңел. Тәмле булсын!

Сурәт: ясалма фәһем