СОҢГЫ КЫҢГЫРАУДА НИШЛИБЕЗ?

1. Актлар залын, бәйрәм узасы урынны бизәр өчен махсус бер тематика сайлап алыгыз. Ул бүтән еллардан аерылып торса, тагын да яхшырак булачак. Маркетплейслар, кибетләр сезгә ярдәмгә киләчәк.
2. Укытучылар белән бергәлектә видео әзерләгез. Хәзерге трендларны куллансагыз да була. Бәйрәм көнне барлык кешегә иҗат җимешегезне күрсәтсәгез, һичшиксез барлык кешенең дә исендә калачаксыз. Шулай ук сыйныфыгызның фото, видеолары белән дә таныштырырга онытмагыз.
3. Бию сайлаганда, вальста гына тукталып калмагыз. Татарча ут җырларга флешмоб биеп карагыз. Кечкенә генә дискәтүк тә ясый аласыз.
4. Һәр ел сөйләнә торган шигырьләрне читкәрәк куеп торып, башка авторларның да иҗатына игътибар итегез. Бәлки сыйныфыгызда каләм тибрәтүче бардыр, игътибар үзәгенә сыйныфташларыгыз, дусларыгызның шигырьләрен алыгыз.
5. Бәйрәмнән соң җыелышып «пикник» уздырыгыз.  Саф һавада тәмлүшкалар ашап, гитарага кушылып җырласагыз, олыгайгач та сагынып искә алырсыз! Шулай ук балачактагы уеннарны искә алсагыз да, кызыклы булачак.

Бәйрәмегез күңелле һәм рәхәт узсын, дуслар!