СӨЙЛӘРГӘ «ОЯЛА» ХОББИЛАР

Без кайбер мавыгуларыбызны горурланып сторисларга куябыз: спорт, рәсем ясау, музыка, блог алып бару, сатуга ниндидер эшләнмәләр ясау, мәсәлән. Ә кайберләрен «сәер», «бу җитди түгел», «балалар өчен генә», «кешеләр ни дияр» дип уйлап, яшерергә тырышабыз. Ә хобби бит ул, беренче чиратта, сиңа рәхәтлек китерергә тиеш әйбер.

 «Оят» дип саналган мавыгуларга ниләрне кертә соң яшүсмерләр?

Бу – «дәрәҗәле» булып күренмәгән, акча китермәгән, «уңышлы кеше» образына туры килмәгән, сәер яки артык гади тоелган шөгыльләр.

Һәм нәкъ менә алар еш кына безне чын-чынлап тере итеп тоярга ярдәм итә дә инде.

 Көндәлек алып бару

Күпләр көндәлекләрне балалар эше яки «артык драма» дип уйлый.
Ә чынлыкта ул үз-үзең белән иң ихлас сөйләшү ысулларының берсе.

Матур язу өчен түгел, баштагы уйларны кәгазьгә чыгарып, җиңелрәк булып калсын өчен кирәк бу шөгыль.

«Дөрес түгел» музыка тыңлау

Поп, иске хитлар, 2000 еллар җырлары, мультфильмнар музыкасы: без еш кына үзебезнең музыкаль зәвыгыбыздан оялабыз, әйтерсең лә музыкага карап акылны тикшерәләр.

Төрле җырлар тыңлау ул тирә-юньдәгеләргә «текә» булып күренү өчен кирәкми, иң мөһиме – күңелгә рәхәт булырга тиеш.

Сәер әйберләр җыю

Наклейкалар, ташлар, фигуркалар, билетлар, открыткалар.
Кемгәдер болар – чүп. Синең өчен – истәлек, җылылык, «бу минеке» дигән хис.

Барысы да тиз югала торган дөньяда мизгелләрне саклау ысулы булу бик шәп ул.

 «Яшькә туры килми» дип саналган уеннар

«Син һаман уйныйсыңмы әллә?» Әйе. Һәм бу да гадәти.

Уеннар ял, тәртипсезлек дөньясында контроль хисе, башка рольләрдә яшәү мөмкинлеге, кайчак тынычлануның бердәнбер юлы булып тора.

Монда яшьнең бер катнашы да юк.

«Файдасыз» эшләр белән шөгыльләнү

Чигү, буяу, әвәләү, пазл җыю, бер үк нәрсәне кат-кат карау.
Бу ялкаулык та, вакытны әрәм итү дә түгел.

Хобби гел файда китерергә тиеш түгел. Бу шөгыльләр рәхәтләнеп эмоцияләр кичерер өчен кирәк.

ИСТӘ ТОТ!

Әгәр синең мавыгуың беркемгә дә зыян китерми, сиңа үзеңне яхшырак хис итәргә ярдәм итә, димәк, БАРЫСЫ ДА ТӘРТИП.