СИҢА НИНДИ ТӨСЛӘР КИЛЕШӘ?

Ни өчен кайбер кешегә билгеле бер төстәге киемнәр бик килешә һәм аның йөзен ачып җибәрә, ә икенчеләргә туры килеп бетми икән? Моның сере – үзеңә туры килгән төсне сайлый белүдә. Ул безнең көчле якларыбызны күрсәтә һәм кимчелекләребезне яшерә ала. Әлеге язмада мин сине төсләрнең серләре белән таныштырырмын һәм сиңа килешә торганын табарга ярдәм итәрмен.

НӘРСӘ СОҢ УЛ – ТӨС ТӨРЕ?

Төс төре, русча әйткәндә «цветотип» – кешегә туры килә торган төсләрне билгеләргә ярдәм итә торган система. Төс төреңне белсәң, кием, аксессуарлар сайлау да җиңелрәк була. Хәтта бизәнгәндә дә моңа игътибар бирү мөһим. 

НИНДИ ТӨС ТӨРЛӘРЕ БАР?

Классик системада ешрак фасыл классификациясен кулланалар һәм барлык төсләр дә 4 группага бүленә:

Яз

Җәй

Көз

Кыш

Төс төрен үзең көзге каршына басып та, стилист ярдәме белән дә, хәзер инде нейрочелтәр белән киңәшләшеп тә билгеләп була. Әйдәгез, ясалма фәһемне бераз эшкә җигеп алабыз. Аңа промпт белән бергә минем фотоны да җибәрәбез. 

Бөтен кеше дә куллана ала торган промпт: 

«Син – профессиональ стилист һәм имидж-консультант. Мин җибәргән фотографиягә карап һәм түбәндәге пунктларга таянып, әлеге кешегә тулы стилистик анализ яса.

1. Кешенең якынча төс тибын билгелә: яз, җәй, көз яки кыш.

2. Нинди төстәге киемнәргә игътибар итәргә икәнлеген ачыкла.

3. Нинди кием стильләре һәм образлар аңа гармонияле күренергә мөмкинлеген тәкъдим ит. Мәсәлән: минимализм, классика, романтик стиль, спорт-шик, винтаж һәм башкалар.

4. Кайсы төсләр кешенең йөзен тонык, арыган итеп күрсәтергә мөмкинлеген әйт. Аларны бөтенләй тыю урынына, ничек дөрес кулланырга мөмкин булуын аңлат.

Башта 2-3 җөмләдән торган гомуми нәтиҗә бир, аннары киңәшләрне тематик бүлекләргә бүл. Ахырда «Стилисттан кыска киңәш» дигән бер җөмләлек йомгак өстә».

Нейрочелтәр җавабы:

Бу фотога караганда, әлеге кызга йомшак, җиңел образлар килешәчәк. Аңа тыныч һәм саф төсләргә игътибар итәргә кирәк.

1. Йөзе нәфис, контрастлыгы уртача-түбән булганлыктан, аның төс тибы җәй төркеменә якын. Шуңа күрә артык кырыс яки «авыр» төсләрдән бигрәк, салкын төсләр килешәчәк.

2. Аңа ак, алсу, күк зәңгәр, томансу зәңгәр төстәге киемнәргә игътибар итәргә кирәк.

Фотодагы ак + кызыл комбинациясе дә начар түгел: ак төс йөзне яңарта, ә кызыл образга акцент өсти. Әмма аңа үтә ачык, агрессив кызылдан бигрәк, кызылның салкынрак варианты кебек төсләр тагын да гармониялерәк булачак.

3. Аңа романтик стиль (җиңел тукымалар; ачык иңсәләр, йомшак силуэтлар; итәкләр, сарафаннар, блузкалар; энҗегә охшаган яки көмеш аксессуарлар) яисә якты минимализм (артык күп детале булмаган кием; тыныч төсләр; бер-ике акцент белән җыелган образлар) стиле килешәчәк.

4. Кара, көрән, неон, кычкырып торган сары төсмерләре йөзне тонык яки арыган итеп күрсәтергә мөмкин. Ләкин бу төсләрне бөтенләй киергә ярамый дигән сүз түгел. Аларны дөрес куллану юллары бар:

– әгәр кара төсне яратса, аны йөздән ераграк кулланырга була (итәк, чалбар, сумка, аяк киеме);

– җылы төсләрне аксессуарларда гына кулланырга мөмкин;

– йөзгә якынрак урында ак, салкын алсу, күк, зәңгәр кебек төсләр булса, образ тигезләнә.

Стилисттан кыска киңәш: йомшак салкынча төсләргә, җиңел силуэтларга һәм табигый романтик образларга таянсаң, тышкы кыяфәтең тагын да нәфис һәм истә кала торган булачак.

Берничә минут эчендә үземнең төс төрен һәм миңа килешә торган төсләрне белдем. Я, сез дә эшләп карагыз әле.