ОРВИ СЕЗОНЫ КЫЗГАННАН-КЫЗА БАРА

Бүгенге көндә ОРВИ белән авыручылар саны арта бара, бер атна эчендә 63%ка күтәрелгән бу күрсәткеч. Мәктәп укучылары арасында тенденция ике тапкыр тизрәк бара. Моңа гаҗәпләнерлек тә түгел, чөнки хәзер көз – авырулар сезонының иң кызган чагы. Ата-аналар «Нәрсә эшләргә? Ничек дәваларга?» дип борчыла. Барлык кызыксындырган сорауларга җавап бирү өчен без үз эшенең остасы, балалар табибы, педиатр Рүфилә Шакирова белән сөйләштек.

– Көз көннәрендә ОРВИ нигә көчәя?

– Көз җитүгә балалар арасында салкын тию, ОРВИ дигән авырулар гел арта. Моның сәбәбе нәрсәдә? Әлбәттә, монда берничә фактор роль уйный:

1. Балалар коллективы

Җәйге каникуллардан соң балалар мәктәпкә, балалар бакчасына, төрле түгәрәкләргә йөри башлый, һәм, әлбәттә, анда алар бер-берсе белән еш аралашалар. Бу исә алар арасында инфекцияне тиз таралуына йогынты ясый.

2. Һава торышының үзгәрүе

Кинәт суыту яисә һава торышына туры килмәгән кием иммунитетны көчсезләндерә.

3. Җылылык бирү чоры

Биналарда җылылык бирелә башлагач, балалар бакчаларында яки мәктәпләрдә кабинет һавасы бик коры була, ә бу вируслар һәм инфекцияләр артуына бик уңайлы тирәлек булып санала.

– Иммунитетны ничек ныгытырга?

– Кызганычка каршы, иммунитетны ныгытырга ярдәм итә торган бер генә «тылсымлы дару» да юк. Ләкин моны мөстәкыйль рәвештә эшләргә ярдәм итүче кайбер гадәтләр һәм киңәшләр бар:

1. Дөрес һәм балансланган туклану.
2. Физик активлык, мәсәлән, саф һавада йөрү.
3. Бүлмәләрне җилләтү һәм һаваны дымландыру.
4. Гигиена: кулларны еш юу.
5. D витамины эчү. Дефицит булганда – дәвалану өчен, булмаганда – профилактика өчен.
6. Гриппка каршы ел саен вакцинация ясату.

– ОРВИны ничек дәваларга?

– ОРВИны дәвалауның төп максаты – симптомнарны җиңеләйтү.

1. Температура

Баланың температурасы 38,5 градустан югары булганда яки ул температураны бик авыр кичергәндә генә төшерергә кирәк. Моның өчен парацетамол яки ибупрофен кулланырга мөмкин.

2. Борын тыгылу

Һаваның дымлылыгын 50-60% тирәсендә тотырга кирәк. Борынны тозлы су белән юу мөһим.  

3. Йөткерү

Йөткерү ул – авыру түгел, ә симптом гына. Күп очракта ул борыннан төшкән лайла белән бәйле. 

4. Тамак авырту.

Тамак авыртуын бераз басар өчен, салкын эчемлекләр эчәргә киңәш ителә. Шулай ук, 4 яшьтән узган балаларга махсус суыра торган дарулар, спрейлар кулланырга мөмкин.

– Кайчан табибка мөрәҗәгать итәргә?

– Гадәттә ОРВИ җиңел, катлаулануларсыз уза. Әмма, әлбәттә, искәрмәләр булырга һәм авыру катлауланырга да мөмкин:

1. Бактериаль инфекция кушылу
2. Күз, колак, борын куышлыгы һәм үпкә авырулары
3. Сирәгрәк – йөрәк мускулы яки нерв системасы зарарлану.

– ОРВИ белән авырган баланы кайчан балалар бакчасына яки мәктәпкә җибәрергә мөмкин?

– Гадәттә баланың тулысынча терелүе өчен якынча 7 көн кирәк. Аннан соң, әгәр хәле яхшы булса һәм табиб рөхсәт итсә, бала кабат коллективка кайта ала.

– Балаларга, әти-әниләргә, укытучыларга нинди киңәш бирер идегез?

– Иң мөһиме – «тылсымлы дару» эзләргә кирәкми. Организмга дөрес шартлар тудырсак, ул үзе инфекцияне җиңәчәк.

Сау-сәламәт булыгыз, дуслар!