ТАТАР ТЕЛЕ ИМТИХАНЫН САЙЛАУЧЫ 11 СЫЙНЫФ УКУЧЫЛАРЫ САНЫ ИКЕ ТАПКЫРГА АРТКАН

2026 елда Татарстанда татар теле буенча бердәм республика имтиханын сайлаган 11 нче сыйныф укучылары саны сизелерлек арткан. Бу хакта конференциядә Татарстан Мәгариф һәм фән министрлыгының урынбасары Минзәлия Закирова хәбәр итте.

Аның сүзләренә караганда, быел 78 чыгарылыш укучысы татар теле буенча имтихан тапшырырга ниятли. Узган ел бу күрсәткеч нибары 34 булган. Шулай ук татар әдәбиятын 4 укучы сайлаган.

9 нчы сыйныф укучылары арасында да туган тел имтиханнарына кызыксыну арта. Быел татар телен 5 783 укучы сайлаган. Гомумән алганда, туган тел һәм әдәбият буенча имтиханнарны 5 889 кеше тапшырырга җыена.

Моннан тыш, туган телне сайлап алучы укучылар арасында башка телләр дә бар: 70 кеше – чуаш телен, 24 укучы – удмурт телен, 22 укучы мари телен сайлаган.

Чагыштыру өчен, 2024 елда татар телен нибары 8 укучы сайлаган булса, 2025 елда бу сан 34 кә җиткән. Соңгы елларда телгә кызыксыну артуы күзәтелә.

Белгечләр фикеренчә, бу тенденция милли телләргә игътибар арту һәм аларны саклау юнәлешендә алып барылган эшләр белән бәйле.