МАКАРУНС КӨНЕ: ӨЙДӘ ФРАНЦУЗ ДЕСЕРТЫ ӘЗЕРЛИБЕЗ

Тыштан – кетердәп тора, эчтән – йомшак, ә уртасында тәмле крем. Макарунс, ягъни французча macaron, дөньядагы иң танылган десертларның берсе. Макарунс көне уңаеннан аны өйдә әзерләп карарга тәкъдим итәбез.

Кирәк булачак

Печенье өчен:

• миндаль оны – 100 г
• шикәр пудрасы – 100 г
• йомырка агы – 70 г
• шикәр комы – 70 г
• теләк буенча азык буявы

Крем өчен:

• ак яки сөтле шоколад – 100 г
• 33%лы сөт өсте – 70 мл

Ничек әзерләргә?

1. Коры ингредиентларны әзерлибез.
Миндаль оны белән шикәр пудрасын бергә кушып, иләк аша чыгарабыз. Болай эшләгәндә печеньелар тигезрәк һәм матуррак килеп чыга.

2. Йомырка агын күпертәбез.
Йомырка агын миксер белән күпертә башлыйбыз. Әкренләп шикәр комын өстибез. Масса куе, ялтыравык һәм формасын саклый торган булырга тиеш. Төсле макарунс ясарга теләсәгез, шушы этапта аз гына азык буявы өстәгез.

3. Камыр ясыйбыз.
Миндальле катнашманы йомырка агына берничә өлештә өстәп, сак кына болгатабыз. Камыр кашыктан калын тасма кебек агып төшәргә тиеш.

4. Макарунсларны формалаштырабыз.
Камырны кондитер капчыгына тутырып, пергамент кәгазенә кечкенә түгәрәкләр итеп чыгарабыз. Табаны өстәлгә берничә тапкыр җиңелчә бәреп алыгыз – артык һава куыклары чыгар.

5. Бераз көтәбез.
Макарунсларны бүлмә температурасында якынча 30–40 минут тотыгыз. Өсләренә бармак белән җиңелчә кагылганда камыр ябышмаса, пешерергә була.

6. Пешерәбез.
150°C ка кадәр җылытылган мичтә якынча 13–15 минут пешерәбез. Әзер печеньеларны тулысынча суынгач кына пергаменттан алабыз.

Крем әзерлибез

Сөт өстен кайнап чыгар дәрәҗәгә җиткермичә җылытабыз һәм вакланган шоколад өстенә салабыз. Берничә минут көтеп, тигез масса булганчы болгатабыз. Кремны суыткычка куеп куертабыз.

Аннары ике макарунс яртысы арасына крем сылап, берләштерәбез.

Иң мөһим сер

Әзер макарунсларны шунда ук ашап бетерергә ашыкмагыз. Аларны ябык савытта суыткычта бер төн тотсаң, крем печеньега сеңә һәм десерт тагын да йомшаграк, тәмлерәк була.

Тәмле экспериментлар һәм матур макарунслар!