КИЛӘЧӘККӘ ХАТ

Киләчәк турында уйлаганда без гадәттә планнар корабыз: кайда укырмын, кем булып эшләрмен, кайда яшәрмен, нинди кеше булырмын? Ә менә берничә елдан соң бүгенге үзебезне нинди итеп искә төшерәчәгебез турында сирәк уйлыйбыз.

Бүгенге көндә сине нәрсә борчый? Кайсы җырны көненә биш тапкыр тыңлыйсың? Кем белән иң күп аралашасың? Нәрсә турында хыялланасың? Ә нәрсәдән куркасың?

Хәзер болар барысы да бик мөһим кебек. Әмма бер ел, биш ел, ун ел үткәч, күп нәрсә онытылырга мөмкин.

Шуңа күрә киләчәккә хат – хәтер өчен кечкенә генә «архив».

Бүгенге үзеңә карап алу мөмкинлеге

Мондый хатта матур җөмләләр кирәк түгел. Аны беркем дә тикшерми, билге дә куймый. Иң мөһиме – ихлас булу.

Мәсәлән, болай язарга мөмкин:

«Мин хәзер 15 яшьтә. Мәктәптә иң авыры – иртән тору. Соңгы атнада бер үк җырны тыңлыйм. Киләчәктә журналист булырга телим. Ләкин булдыра алырмынмы – белмим...»

Берничә елдан соң нәкъ менә шундый гади җөмләләр иң кызыклысы булып чыгачак. Чөнки киләчәктә син үзеңнең нәтиҗәләреңне генә түгел, нәрсә турында уйлаганыңны да күрәчәксең.

Киләчәктәге үзеңә сорау бир

Хатның иң кызык өлеше – сораулар.

Һаман да будильникны биш тапкыр күчерәсеңме?

Иң якын дусларым һаман да янәшәме?

Кайсы хыялым тормышка ашты?

Ә кайсысын оныттым?

Мондый сорауларга бүген җавап юк. Шуңа күрә алар кызык та.

Хатка фаразлар да керсен

Киләчәккә хатны кечкенә экспериментка да әйләндерергә мөмкин.

«Бер елдан мин...», «мәктәпне тәмамлагач...», «25 яшемдә...», «безнең класс белән...», «иң популяр кушымта ул чакта...» дип үз фаразларыңны язып калдыр.

Берничә елдан хатны ачкач, аларның кайсысы туры килгәнен тикшерү үзе бер күңелле эш булачак.

Хатны тагын да кызыклырак итәсең килсә, аңа бүгенге тормыштан берничә деталь өстә.

Мәсәлән, хәзерге фотосурәт, биш яраткан җыр исемлеге, концерт билеты, кечкенә рәсем яки дусларың язган бер җөмлә. Шулай итеп, хат гади тексттан вакыт капсуласына әйләнә. Берничә елдан соң син анда сүзләр генә түгел, бүгенге тормышыңның атмосферасын да табарга мөмкинсең.