КАРЛЫГАННАН ТӘМЛҮШКӘЛӘР ЯСЫЙБЫЗ

Җәйнең иң файдалы җиләкләренең берсе – карлыган. Кара, кызыл һәм ак карлыганның һәркайсы витаминнарга, антиоксидантларга һәм пектинга бай. Җиләк-җимешләрне даими куллану организмны С витамины, клетчатка һәм үсемлек антиоксидантлары белән тәэмин итә. Ә карлыганның тәме аның белән төрледән-төрле ризыклар әзерләргә мөмкинлек бирә. Бу язмада исә шуларның берничәсе белән танышырбыз.

Карлыган кайнатмасы

Карлыганнан иң киң таралган ризыкларның берсе – кайнатма. Аны коймак, белен, сырник, ботка белән ашап була. Кара карлыган табигый пектинга бай булганлыктан, кайнатма куерак килеп чыга.

Компот һәм морс

Эссе җәй көнендә карлыган морсы сусауны яхшы баса. Моның өчен җиләкләрне изеп, согын алалар, ә калган өлешен суда кайнатып, соңыннан согы белән кушалар. Бу ысул җиләкнең тәмен һәм хуш исен яхшырак сакларга ярдәм итә.

Сорбет

Туңдырылган карлыган, бал һәм лимон согын блендерда болгатып, өй шартларында табигый сорбет әзерләргә мөмкин. Бу десертта ясалма буяулар да, консервантлар да булмый.

Пирог һәм кекс

Карлыган камыр ризыкларына бераз әчкелтем тәм өсти. Аны ачык пирогларга, маффиннарга, кексларга, ватрушкаларга һәм бисквитларга салалар. Пешкәндә дә карлыган үзенең хуш исен яхшы саклый.

Желе

Карлыган пектинга бай булганлыктан, аңардан желе әзерләү бик җайлы. Кайбер рецептларда, хәтта өстәмә желатин да кирәкми.

Соус

Кара карлыганнан ит һәм кош ите өчен әчкелтем-татлы соус та әзерлиләр. Европаның күп илләрендә мондый соус үрдәк, сыер ите һәм кыргый кош итләре белән бирелә.

Чәй

Киптерелгән карлыган яфракларыннан хуш исле үлән чәе пешерәләр. Моннан тыш, яңа яфракларны кыяр һәм помидор тозлаганда да кулланалар – алар яшелчәләргә үзенчәлекле хуш ис бирә.