КАҺВӘНЕ АЛЫШТЫРА АЛЫРЛЫК 5 ҖЫЛЫ ЭЧЕМЛЕК

Көз һәм кыш көннәрендә кул үзеннән-үзе каһвәгә сузыла: ул җылыта, көч бирә, кәефне күтәрә. Әмма кайчак йомшаграк, рәхәтрәк, кофеинсыз тәмле әйбер эчәсе килә. Һәр кешегә дә ярап бетми бит әле ул каһвә: зыяны да бар. Аны алыштыра алырлык, көзге вайбка туры килә торган 5 альтернатив эчемлек тәкъдим итәбез.

1. Имбирьле бал-лимон чәе

Салкын тиюгә каршы классика. Имбирь кан йөрешен көчәйтә, тәнне җылыта; лимон С витамины бирә; ә бал эчемлекнең тәмен йомшарта һәм иммунитетны ныгыта.

Ничек әзерләргә:

1. Имбирьне нечкә итеп тура.
2. Өстенә кайнар су сал, 10 минут төнәтеп тор.
3. Бал һәм бераз лимон өстә.

Киңәш: чәең тагын да энергияле булсын дисәң, аз гына кызыл борыч өстә.

2. Дарчин (корица) һәм тоз белән какао

Табигый какао – магний һәм «шатлык гормоны» серотонин чыганагы. Ә аңа аз гына тоз өстәү тәмне көчәйтә һәм эчемлекне баета.

Ничек әзерләргә:

1. Сөтне җылыт.
2. 1–2 чәй кашыгы какао, аз гына дарчин һәм тоз өстә.
3. Болгатып җибәр, теләсәң, өстенә маршмеллоу яки каймак куй.

3. Матча-латте

Кайберәүләргә йомшак кына уятучы эчемлек кирәк: бу очракта японча матча чәе ярап куя. Анда кофеин азрак, ләкин L-теанин күбрәк, ул тынычландыра, шул ук вакытта игътибарны көчәйтә.

Ничек әзерләргә:

1. 1 чәй кашыгы матчаны җылы су белән болгат.
2. Өстенә җылытылган сөт һәм аз гына бал яисә сироп өстә.
3. Венчик белән күперткәнче болгат.

4. «Алтын сөт» (куркума белән сөт)

Һиндстаннан килгән танылган эчемлек. Куркума ялкынсынуны, салкын тиюне киметә, кәефне күтәрә һәм салкын вакытта җылылык бирә.

Ничек әзерләргә:

1. Сөтне җылыт, ½ чәй кашыгы куркума, аз гына бал һәм кара борыч өстә (кара борыч куркуманың файдасын арттыра).
2. Теләсәң, имбирь, дарчин яки мускат чикләвеген дә кертеп була бу эчемлеккә.

5. Алмалы глинтвейн

Көзге кичләр өчен иң хуш исле һәм җылы эчемлекләрнең берсе. Өй буйлап алма һәм дарчин исе тарала – чын hygge атмосферасы.

Ничек әзерләргә:

1. Алма согын кастрюльгә сал, дарчин таягы, гвоздика, апельсин телеме һәм бераз бал өстә.
2. Җылыт, ләкин кайнатма.
3. Кружкага салып, алма телеме белән бизә.