ЙОКЫ ОРГАНИЗМГА НИЧЕК ЯРДӘМ ИТӘ?

13 март – дөньякүләм йокы көне. Иң мөһим биологик ихтыяҗыбыз турында әлеге язмада сөйләштек.

Кешенең тормышында йокы мөһим урын алып тора. Галимнәр фикеренчә, кеше гомеренең якынча өчтән бер өлеше йокыда уза. Йокы - организм өчен яңарыш, көч туплау һәм ми эшчәнлеген тәртипкә китерү вакыты.

Йокы ни өчен кирәк?

Йокы вакытында кеше организмы актив рәвештә эшләүдән туктамый. Киресенчә, бу чорда организм үзен «төзәтә»: күзәнәкләр яңара, иммунитет ныгый, хәтер яхшыра. Галимнәр раславынча, йокы җитмәү игътибарның кимүенә, стресс артуына һәм сәламәтлек какшавына китерергә мөмкин.

Балаларга һәм яшүсмерләргә бигрәк тә җитәрлек йокы кирәк. Табиблар киңәше буенча:

яшүсмерләр – 8–10 сәгать,

олылар – 7–9 сәгать йокларга тиеш.

Йокы турында кызыклы фактлар

1.       Кеше һәр төн төшләр күрә, әмма иртән аларның күп өлешен оныта.
2.       Йокы вакытында баш мие көндез алынган мәгълүматны «тәртипкә сала», шуңа күрә уку яки имтихан алдыннан яхшы йокы зарур.
3.       Кешенең биологик сәгате бар. Шуңа күрә бер үк вакытта йокларга яту организм өчен иң файдалысы санала.
4.       Йокы җитмәү аппетитны арттыра ала, чөнки гормоннар балансы үзгәрә.
5.       Кайбер галимнәр фикеренчә, кыска гына көндезге йокы (20–30 минут) кешенең игътибарын һәм эш сәләтен арттыра ала.

Дөрес йокы режимы

Белгечләр йокының сыйфатын яхшырту өчен берничә гади киңәш бирә:

1.       Бер үк вакытта йокларга ятарга һәм торырга тырышыгыз.
2.       Йоклар алдыннан телефон һәм компьютер куллануны киметергә кирәк. Экран яктылыгы йокы гормоны – мелатонин бүленеп чыгуны акрынайта.
3.       Бүлмәдә саф һава булсын, температура артык югары булмасын.
4.       Кич белән кофе, көчле чәй, энергетик эчемлекләр кулланмаска киңәш ителә.
5.       Йоклар алдыннан тыныч музыка тыңлау, китап уку яки кыска гына йөреп керү файдалы.