ЯЗГЫ АВИТАМИНОЗ БЕЛӘН НИЧЕК КӨРӘШЕРГӘ?

Кыш ахыры-яз башында кайбер кешеләр апатия һәм көчсезлек хисе белән очраша. Бу күпчелек очракта язгы авитаминоз белән бәйле. Нәрсә соң ул авитаминоз һәм ул булмасын өчен ниләр эшләргә икәнен беләсегез килсә, язмабызны укыгыз.

Авитаминоз – организмда витаминнар җитмәү нәтиҗәсендә барлыкка килгән патологик халәт. Яз көне ул аеруча кискенләшә, чөнки кыш буе кояш нурлары аз булганлыктан, организм D витаминын җитештерүдә кыенлыклар кичерә.

Язгы авитаминоз булмасын өчен түбәндәге пунктларны үтәү мөһим:

1. Рационыгызны баланслаштырыгыз. Күбрәк яшелчәләр һәм җиләк-җимешләр ашагыз. Мондый вакытта яшел суган, керән, редиска, кәбестә, кишер, алма, цитруслылар бигрәк тә файдалы. Шулай ук майлы балык, йомырка, сөт продуктлары, ит һәм көндәлек төрле чикләвекләр ашарга киңәш ителә.

2. Витаминнар комплексы эчегез. Әмма моны катгый рәвештә табиб белән киңәшләшкәч кенә эшләү дөрес. Үз-үзеңне дәвалау белән шөгыльләнү яхшыга китерми!

3. Актив тормыш рәвеше алып барыгыз. Көн саен саф һавада йөрү, спорт белән шөгыльләнү сәламәтлек өчен файдалы икәнен болай да беләсездер.

4. Көндәлек режимны саклагыз. Көн саен бер үк вакытта йокларга ятыгыз һәм уяныгыз, ким дигәндә 7-8 сәгать йоклагыз.

Яз – яңа тормыш башлану вакыты. Үзегезнең сәламәтлегегез турында кайгыртыгыз, дөрес тукланыгыз, актив булыгыз, һәм язгы авитаминоз сезнең өчен бернинди дә киртә тудырмас!